Áleýmettik-eńbek salasyndaǵy qyzmetterdi avtomattandyrý: 114 mln teńge únemdeldi
2023 jyldyń birinshi jartyjyldyǵynyń qorytyndysy boıynsha áleýmettik-eńbek salasyndaǵy memlekettik qyzmetterdi ońtaılandyrý men proaktıvti formatqa aýystyrýdyń nátıjesinde memlekettik bıýdjetten 114 mln teńgeden astam soma únemdeldi.
Mundaı nátıjege qujattarǵa qol qoıýshylardy qysqartý jáne keıbir qyzmetkerlerdi memlekettik qyzmet kórsetý protsesinen shyǵarý arqyly qol jetkizildi. Bul jumysty Eńbek jáne halyqty áleýmettik qorǵaý mınıstrligi qyzmet kórsetý protsesterin transformatsııalaý jáne reınjınırıng sheńberinde ótkizdi.
Máselen, 2022 jyldyń sońynan bastap 2023 jyldyń basyna deıin 3 memlekettik qyzmet avtomattandyryldy: «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen nagradtalǵan kópbalaly analarǵa memlekettik járdemaqy taǵaıyndaý, múgedektigi boıynsha memlekettik áleýmettik járdemaqy taǵaıyndaý jáne jerleýge birjolǵy tólem taǵaıyndaý.
Atalǵan qyzmetterde adam faktory tolyǵymen alynyp, avtomatty túrde taǵaıyndala bastaldy.
Osylaısha, qyzmet alýshylarǵa proaktıvti formatta qyzmetti alý múmkindigi týraly SMS-habarlama jiberilip, oǵan jaýap alǵan kezde aqparattyq júıe adamnyń qatysýynsyz shamamen 1 kún ishinde járdemaqy taǵaıyndaý týraly sheshim qabyldaıdy.
Buryn járdemaqy taǵaıyndaý týraly sheshim qabyldaýǵa 7 adam qatysyp, úrdis 8 jumys kúnine deıin sozylatyn.
Sonymen qatar, bala týýǵa jáne bala kútimine arnalǵan járdemaqy, júktilikke jáne bosanýǵa baılanysty tabysynan aıyrylǵan jaǵdaıda beriletin áleýmettik tólem, sondaı-aq bala bir jarym jasqa tolǵannan keıin onyń kútimine baılanysty tabysynan aıyrylǵan jaǵdaıda taǵaıyndalatyn áleýmettik tólem boıynsha ótinishterdi qaraý tártibi jeńildetildi.
Ońtaılandyrý aıasynda «Azamattarǵa arnalǵan úkimet» memlekettik korporatsııasy» KEAQ mamandarynyń osy protseske qatysýy alynyp tastalyp, bul qyzmet kórsetý merzimi 8 kúnnen 4 jumys kúnine deıin qysqartyldy.
2023 jyldyń sońyna deıin osyndaı tártippen kórsetiletin qyzmetterdiń taǵy 4 túri boıynsha ótinishterdi qaraý merzimin qysqartý josparlanýda. Olar: kópbalaly otbasyna járdemaqy taǵaıyndaý; eńbek etý qabiletinen aıyrylǵan jaǵdaıdaǵy áleýmettik tólem; asyraýshysynan aıyrylǵan jaǵdaıdaǵy áleýmettik tólem; birinshi, ekinshi jáne úshinshi toptaǵy múgedektigi bar adamdarǵa arnaýly memlekettik járdemaqy.