Áleýmettik-eńbek salasynda kórsetiletin qyzmetter elektrondyq formatqa kóshiriledi
Ortalyq kommýnıkatsııalar qyzmetinde onlaın rejımde ótken halyqqa esep berý kezdesýi barysynda Birjan Nurymbetov Eńbek jáne halyqty áleýmettik qorǵaý mınıstrligi tsıfrlandyrý deńgeıi boıynsha jetekshi memlekettik organdardyń biri bolyp tabylatynyn atap ótti. Tek 2019 jyldyń ózinde ǵana áleýmettik-eńbek salasyndaǵy kórsetiletin qyzmetterdi elektrondyq formatqa aýystyrý 2,2 mlrd teńgeni únemdeýge múmkindik berdi.
Máselen, jumyspen qamtý jáne jumysqa ornalastyrý salasynda «Elektrondyq eńbek bırjasy» jáne «Elektrondyq eńbek sharttary» jobalary iske asyrylýda. Búgingi tańda «Elektrondyq eńbek bırjasy» 214 myń jumys berýshini, mıllıondaı jumys izdeýshini, Coursera onlaın bilim berý platformasy arqyly 1,5 myń saǵatqa jýyq tegin sabaqty qamtıdy.
«Elektrondyq eńbek bırjasy» arqasynda 1,2 mln-nan astam adam jumys taba aldy. Olardyń ishinde 868 myń adam turaqty jumys oryndaryna, 341 myńy ýaqytsha jumysqa ornalastyryldy», – dedi mınıstr.
Al «Elektrondyq eńbek sharttary» jobasyna 35 myń uıym qosylǵan. Qazirgi ýaqytta 1,4 mln elektrondyq shart tirkeldi. Bul jumyskerlerdiń eńbek quqyqtaryn qorǵaýǵa yqpal etetin bolady.
«2019 jyldyń basynda memlekettik qyzmetterdi avtomattandyrý bóliginde elektrondyq qyzmetterdiń úlesi 42 paıyzdy qurap edi. 2019 jyldyń qorytyndysy boıynsha ol 83 paıyzǵa artty. Mundaı ósimge Egov portalyndaǵy 6 memlekettik kórsetiletin qyzmetti ornalastyrý jáne 10 qyzmetti belsendi formatqa aýystyrý arqyly qol jetkizildi. 2020 jyldyń sońyna deıin biz elektrondyq qyzmetterdiń úlesin 100 paıyzǵa jetkizýdi josparlap otyrmyz», – dedi Birjan Nurymbetov.