Áleýmettik-eńbek salasyn tsıfrlandyrýda 3 mlrd teńge únemdeldi

NUR-SULTAN. QazAqparat - QR Eńbek jáne halyqty áleýmettik qorǵaý mınıstrligi tsıfrlyq jobalardy iske asyrý jáne Memlekettik qyzmetterdi elektrondyq jáne proaktıvti formatqa kóshirý arqyly bıýdjet qarajatyn 3,03 mlrd teńge únemdedi, dep habarlaıdy QazAqparat mınıstrliktiń baspasóz qyzmetine silteme jasap.

«Bul somany esepteý kezinde «Elektrondyq eńbek bırjasy» jáne «Eńbek sharttaryn esepke alýdyń biryńǵaı júıesi» sııaqty jobalar, sondaı-aq elektrondyq formatqa aýystyrylatyn memlekettik qyzmetter eskerildi.

Elektrondyq eńbek bırjasy 2 jyl ishinde jumys berýshiler men jumys izdeýshilerdiń shyǵyndaryn alyp tastaý esebinen 1,6 mlrd teńge kóleminde qarajat únemdeýge múmkindik berdi. Mysaly, qazir jumys berýshilerge Halyqty jumyspen qamtý ortalyqtaryna kelýdiń qajeti joq, bos jumys oryndary bar býma qaǵazdy tapsyrýdyń qajeti joq, endi HJQO shtatynda burynǵydaı osy derekterdi qolmen engizetin birneshe qyzmetshi qajet emes», delingen habarlamada.

Baspasóz qyzmetiniń málimetinshe, elektrondyq eńbek sharttaryn esepke alýdyń biryńǵaı júıesi shartty basyp shyǵarýǵa emes, ony derekqorda saqtaýǵa múmkindik beredi. Buryn kelisimshartqa qol qoıý jáne basyp shyǵarý úshin jumys berýshiler aqsha jumsap, olardy saqtaý úshin jeke oryn bólý kerek edi. Pılottyq joba iske qosylǵan sátten bastap 1,5 jyl ishinde mınıstrlik 430 mln teńgeni únemdedi.

«Únemdeýdiń negizgi bóligi - barlyq qujattardy qaǵazǵa basyp shyǵarý qajettiliginiń bolmaýy. Bul birqatar áleýmettik jáne eńbek qyzmetterin SMS arqyly, egov.kz portalynda nemese EgovKzBot2.0 Telegram-botynda alýǵa bolatyndyǵyna baılanysty. Osynyń arqasynda qyzmetterdi kórsetýden únemdelgen qarajat 1 mlrd teńgeni qurady», delingen habarlamada.

Áleýmettik-eńbek salasyn tsıfrlandyrýda memlekettik qyzmetterdi elektrondyq jáne proaktıvti formattarǵa kóshirý mańyzdy ról atqarady. «Kórip otyrǵanyńyzdaı, eń mańyzdysy tsıfrlandyrý azamattardyń ómirin jeńildetip qana qoımaıdy. Ol sondaı-aq protsesterdi ashyq etedi, bıýdjet qarajatyn únemdeýge janama múmkindik beredi. Tek 2019 jyldyń ózinde ekonomıkalyq tıimdilik 2,154 mlrd teńgege jetti», – dedi QR Eńbek jáne halyqty áleýmettik qorǵaý vıtse-mınıstri Narıman Muqyshev.

Esterińizge sala keteıik, áleýmettik-eńbek salasyn tsıfrlandyrý 2018 jyly bastaldy. Onyń aıasynda «Elektrondyq eńbek bırjasy», «Elektrondyq eńbek sharttaryn esepke alýdyń biryńǵaı júıesi», «Otbasynyń áleýmettik kartasy» jáne basqa da iri jobalar iske asyrylýda.