Áleýmettik-eńbek qatynastaryn retteýdiń tıimdi júıesin qurý qajet - Asqar Mamın
ASTANA. QazAqparat - Áleýmettik-eńbek qatynastaryn retteýdiń tıimdi júıesin qurý qajet. Bul týraly búgin eńbek qatynastaryn retteý jaıy qaralǵan Úkimet otyrysynda QR Premer-mınıstri Asqar Mamın aıtty, dep habarlaıdy QazAqparat tilshisi.
«Búgin eńbek salasyndaǵy birqatar problemalyq máseleler talqylandy. Olardy sheshý úshin naqty sharalar qabyldanatyn bolady. Áleýmettik-eńbek qatynastaryn retteýdiń tıimdi júıesin qurý qajet. Eńbek mınıstrliginiń barlyq usynystaryn qoldaımyn», - dedi Úkimet basshysy.
Aıta keterligi, otyrysta Eńbek jáne halyqty áleýmettik qorǵaý mınıstri Berdibek Saparbaev kásiporyndar qyzmetkerlerine 1,7 mlrd teńge jalaqy qaryz ekendigin, kásiporyndaǵy jalaqy jyl saıyn ınflıatsııa deńgeıinde kóbeıip otyrýy qajettigin aıtqan edi.
«Qazirgi tańda 184 myń kásiporynda 958 myń qyzmetkerdiń jalaqysy ósti. Endigi mindet - ákimshiliktermen, kásipodaq, jumys berýshilermen birigip, osy jumysty jalǵastyrý. Jalaqy jyl saıyn kem degende ınflıatsııa deńgeıinde ósip otyrýy tıis. Jappaı qysqartýǵa jol bermeýimiz kerek», - dedi B.Saparbaev.
