Áleýmettik, eńbek qatynastaryn retteý tetigi jetilmegen - Eńbek jáne halyqty áleýmettik qorǵaý vıtse-mınıstri
ASTANA. 6 jeltoqsan. QazAqparat /Aıdar Ospanalıev/ - Eńbek jáne halyqty áleýmettik qorǵaý mınıstrligi ókilderiniń paıymdaýlarynsha, áleýmettik,
eńbek janjaldarynyń paıda bolýynyń basty sebepteri - jumysshylardyń eńbek quqyqtarynyń buzylýy. Bul týraly búgin Astanada «Ujymdyq, eńbek daýlary men janjaldar: olardyń aldyn alý men retteý» atty taqyrypta ótip jatqan dóńgelek ústel otyrysynda Eńbek jáne halyqty áleýmettik qorǵaý vıtse-mınıstri Birjan Nurymbetov málim etti.
Onyń pikirinshe, búginde elimizde eńbek qatynastaryn retteýde birshama problemalar bar. «Olardyń qatarynda áleýmettik, eńbek qatynastaryn áriptestik negizinde retteý tetiginiń jetilmegendigin ataýǵa bolady. Sonymen qatar eńbek ónimdiligi men oǵan tólenetin jalaqynyń arasyndaǵy aıyrmashylyq ta osy máselelerdiń qatarynda»,-deıdi vıtse-mınıstr.
Ujymdyq kelisimderdi jasaý nemese olarǵa ózgeris engizý sııaqty sharalardyń talapqa saı oryndalmaýy jumysshylar men jumys berýshiler arasynda daý-janjaldardyń týyndaýyna sebep bolyp jatady. «Keı jaǵdaıda taraptardyń arasynda qandaı da bir kelisim nemese qujattar múldem joq bolyp shyǵady. Mundaı oqıǵalardyń saldary keıde tipti ujymdyq deńgeıdegi úlken janjalǵa aınalady»,-deıdi mınıstrdiń orynbasary.
