Áleýmettik birlikti nyǵaıtý úshin medıatsııany tolyqqandy paıdalaný qajet - Nursultan Nazarbaev

NUR-SULTAN. QazAqparat - Áleýmettik birlikti nyǵaıtý úshin medıatsııa ınstıtýtyn tolyqqandy paıdalaný qajet. Bul týraly búgin Qazaqstan halqy Assambleıasynyń XXVII sessııasynda QR Tuńǵysh Prezıdenti - Elbasy Nursultan Nazarbaev aıtty, dep habarlaıdy QazAqparat tilshisi.

"Áleýmettik birlikti nyǵaıtý úshin medıatsııa ınstıtýtyn tolyqqandy paıdalaný qajet. Assambleıa qamqorlyǵymen 800-den astam qoǵamdyq medıator jumys isteıdi. Olardyń belsendi aralasýynyń arqasynda tek ótken jyldyń ózinde ǵana 20 myńǵa jýyq medıatsııalyq kelisim jasaldy. ıAǵnı, daýlar qandaı da bir ýshyǵýǵa jol berilmesten adamdar arasynda sheshildi. Túrmege eshkim otyrǵan joq. Túrme adamdy jaqsylyqqa tárbıelemeıdi, odan jaqsy adam shyqpaıdy", - dedi Elbasy.

QR Tuńǵysh Prezıdentiniń atap ótýinshe, medıatsııa ınstıtýty sot júıesinde, densaýlyq saqtaý, bilim salasynda aıtarlyqtaı tájirıbe jınaqtady.

"Qazirgi ýaqytta medıatsııa ınstıtýtyn kez kelgen daýly máseleniń aldyn alýǵa jáne sheshýge baǵyttaý mańyzdy. Kez kelgen túsinispeýshiliktiń keıin týyndaýy múmkin saldaryn joıǵannan góri ony ymyraǵa kelý arqyly aldyn alǵan durys", - dedi N.Nazarbaev.

Eske sala ketsek, elordada QR Tuńǵysh Prezıdenti - Elbasy, QHA Tóraǵasy Nursultan Nazarbaevtyń tóraǵalyǵymen Qazaqstan halqy Assambleıasynyń XXVII sessııasy ótip jatyr.