Áleýmettik bastamalar 2,5 mln azamattyń jaǵdaıyn kóterýge yqpal etedi - QRKF tóraǵasy

ASTANA. QazAqparat - Prezıdent Nursultan Nazarbaevtyń sońǵy jarııalaǵan áleýmettik bastamalary otbasy koefıtsentine shaqqanda 2,5 mıllıonǵa jýyq azamattyń otbasynyń tikeleı áleýmettik jaǵdaıyn kóterýge yqpal etedi. QR Kásipodaqtar federatsııasynyń tóraǵasy Baqytjan Ábdiraıym osyndaı pikir bildirdi, dep habarlaıdy QazAqparat tilshisi.

«Osydan eki kún buryn Elbasy áleýmettik saladaǵy birneshe bastamalardy jarııalaǵan bolatyn. Bul - búgin ǵana emes, burynnan beri kele jatqan memlekettiń áleýmettik saıasaty. Ótken jylǵa kóz júgirtsek, byltyr naýryz aıynda Elbasy «Bes áleýmettik bastama» aıasynda «7-20-25» baǵdarlamasyn jarııalap, odan keıin tómengi jalaqy alatyn bıýdjettik qyzmetkerlerdiń jalaqysyn kóterdi. Odan keıin ótken jyldyń 2018 jyldyń 5 qazanynda Qazaqstan halqyna kezekti Joldaýynda birneshe áleýmettik bastama kóterip, sonyń aıasynda 1 qańtardan bastap eń tómengi jalaqyny 50 paıyzǵa kóterýge tapsyrma bergen edi. Sonymen, eń tómengi jalaqyny kóterýdiń arqasynda bıyl 1 qańtardan bastap, 800 myńǵa jýyq azamattyń jalaqysy kóterildi», - deıdi QR Kásipodaqtar federatsııasynyń tóraǵasy.

Baqytjan Ábdiraıym 1 qańtardan bastap tómen jalaqy alatyn azamattardyń salyq tóleý júktemesi 10 esege azaıǵanyn atap ótti.

«Men bunyń bárin aıtyp jatqan sebebim, Elbasynyń keshegi tarıhı usynystary áleýmettik saıasattyń jalǵasy dep qarastyrýǵa bolady. Bizdiń Konstıtýtsııada «Qazaqstan óz-ózin áleýmettik memleket retinde jarııa etedi» dep jazǵanbyz. Osy bastamalardyń bári - sol Konstıtýtsııanyń naqty beınesi dep aıtýǵa bolady».

QR Kásipodaqtar federatsııasynyń tóraǵasy óz sózinde bilim jáne densaýlyq, mádenıet jáne sport salasyndaǵy qyzmetkerlerdiń bıýdjet jalaqysy 30 paıyzǵa kóteriletinin eske saldy.

«Bir sózben aıtqanda, 800 myńǵa jýyq azamattyń jalaqysy kóteriledi. Al endi otbasy koefıtsentine shaǵatyn bolsaq, 2,5 mıllıonǵa jýyq otbasynyń tikeleı áleýmettik jaǵdaıyn kóterýge yqpal etedi. Sol sebepten, bul shynyn aıtý kerek, bizde ásirese, tómen jalaqy alatyn azamattarǵa sońǵy jyldary bolmaǵan jeńildik. 1 qańtardan bastap eń tómengi jalaqy kóterildi. Al endi 1 shildeden bastap olardyń jalaqysy taǵy da 30 paıyzǵa kóbeıedi. Sonda 1 jylda keıbir mamandyq boıynsha aılyq 50, 70, 100 paıyzǵa deıin kóterilip otyr», - deıdi Baqytjan Ábdiraıym.

Aıta ketsek, elordada ótken Elbasy Nursultan Nazarbaevtyń tóraǵalyǵymen «Nur Otan» partııasynyń kezekti XVIII sezinde Memleket basshysy halyqty qoldaýǵa arnalǵan birshama áleýmettik bastamalar iske asyrýdy tapsyrǵan bolatyn.