Áleýmettik baǵdarlamalarǵa 2,3 trln teńge bólinedi - Gúlshara Ábdiqalyqova
Gúlshara Ábdihalyqovanyń aıtýynsha, Úkimet músheleriniń óńirlerge sapary barysynda Memleket basshysynyń «Nur Otan» partııasynyń XVIII sezinde alǵa qoıǵan tapsyrmalary talqylanýda. Sondaı-aq, halyqtyń az qamtylǵan toptaryn qoldaý jáne tabysty arttyrýǵa, kiristeri tómen azamattardyń turǵyn úı máselelerin sheshýge, bilim berý jáne densaýlyq saqtaý salalaryn jaqsartýǵa, óńirlerdi keshendi damytýǵa baǵyttalǵan tapsyrmalaryn iske asyrýdyń negizgi baǵyttary túsindiriledi.
«Aldaǵy úsh jylda áleýmettik baǵdarlamalarǵa 2,3 trıllıon teńge bólinedi. 2019 jylǵa arnalǵan respýblıkalyq bıýdjetti naqtylaý týraly zań jobasynda qarajatty 3 baǵyt boıynsha bólý kózdelgen. Máselen, 444,3 mlrd teńge «Áleýmettik qamqorlyq» áleýmettik sharalaryn iske asyrýǵa baǵyttalady.Sáýir aıynda jańa áleýmettik baǵdarlamalardy bastap ketemiz», - dep túsindirdi Gúlshara Ábdihalyqova.
Úkimet jumysynyń basty baǵyttarynyń biri - halyqtyń ál-aýqatyn arttyrý. Kún tártibindegi ilkimdi másele - az qamtylǵan otbasylardy qamtamasyz etý. Sondaı-aq, memlekettik qyzmetkerlerdiń jalaqysyn kóterýge de basymdyq berilip otyr.
«Az qamtylǵan otbasylar úshin ataýly áleýmettik kómek kórsetiledi. El boıynsha 530 myń adam ataýly kómek alyp kelse, al endi jańa ádisteme boıynsha 830 myńnan astam adamǵa kómek usynylady. Bul, aldymen, bıýdjet qyzmetkerlerine, ásirese, muǵalimder men tárbıeshilerge, tómen aılyq alatyndarǵa qatysty», - dedi QR Premer - Mınıstriniń orynbasary.
2019 jyldyń 1 sáýirindegi málimetke súıensek, Qostanaı oblysynda 1809 az qamtylǵan otbasyǵa 145,9 mln.teńge somasynda ataýly áleýmettik kómek kórsetildi.
Al Jumyspen qamtý ortalyqtaryna jáne HQKO-ǵa 1184 adam ataýly áleýmettik kómek boıynsha keńes alýǵa júgindi.
Eske salaıyq, búgin QR Premer-Mınıstriniń orynbasary Gúlshara Ábdiqalyqova bastaǵan jumys toby Qostanaı oblysyna keldi. Gúlshara Ábdixalyqova Qostanaı aýdanyndaǵy HQKO kelgen azamattarmen sóılesip, qyzmet kórsetý barysyn qadaǵalady. Ol turǵyndarǵa ýaqytyly ári sapaly qyzmet kórsetýdi tapsyrdy.
