Áleýmettik ámııan arqyly azyq-túlikti tómen baǵamen satýdyń jańa tetikteri engiziledi - Álibek Qýantyrov
Álibek Qýantyrovtyń aıtýynsha, mınıstrlik múddeli memlekettik organdarmen birlesip, 2022-2024 jyldarǵa arnalǵan ınflıatsııany baqylaý jáne tómendetý boıynsha sharalar kesheni jobasyn ázirledi. Ol jedel jáne ortamerzimdik sıpattaǵy 66 is-sharany qamtıtyn 5 baǵyttan turady. Osy sharalardy iske asyrýdyń maqsaty ınflıatsııany 2022 jyly 4-6% dálizde, al 2024 jyly 4-5% deńgeıinde ustap turý.
«Ónim óndirý kólemin ulǵaıtý» sharalar kesheniniń birinshi baǵyty ońtústik óńirlerde erte pisetin kókónis alańyn 1,2 myń gektarǵa keńeıtý, azyq-túlik qaýipsizdigin qamtamasyz etý josparyn qabyldaý, kóktemgi egis jáne egin jınaý jumysyna jeńildikti kredıt berýdi 70 mlrd teńgeden 140 mlrd teńgege deıin arttyrý, sondaı-aq aýyl sharýashylyǵy men ónerkásiptegi ımportty almastyratyn ınvestıtsııalyq jobalardy iske asyrý jónindegi sharalardy qamtıdy.
«Saqtaý, logıstıka jáne kólik» ekinshi baǵyty kartop pen kókónisterdi saqtaý boıynsha ınvestıtsııalyq jobalardy iske asyrýdy, TShO resýrstarynan ishki naryqqa suıytylǵan munaı gazyn qosymsha bólý máselesin pysyqtaýdy, turaqtandyrý qorlarynyń júktemesin qamtamasyz etýdi kózdeıdi. Sondaı-aq, munaı ónimderin saqtaý kólemi ulǵaıtylyp, ÁMAT (áleýmettik mańyzy bar azyq-túlik taýarlary) shıkizatyn, daıyn ónimin jáne kókónis ónimderin satyp alýdyń qosymsha kólemi qalyptastyrylady.
«Taýarlardyń bólshek saýdasy» baǵyty boıynsha ÁMAT satýshylary úshin jaldaý aqysyn tómendetý, «aınalym shemasyn» qarjylandyrý kólemin jáne turaqtandyrý qoryn qalyptastyrýdy 140 mlrd teńgege deıin jetkizý, iri óndirýshiler men saýda jelileri arasynda ÁMAT baǵalaryn tómendetý jáne qoldaý týraly kelisim jasasý, halyqtyń áleýmettik osal toby úshin marketpleısterde onlaın áleýmettik dúkenderdi engizý boljanyp otyr.
«Baǵa belgileýdi baqylaý, monopolııaǵa qarsy jáne syrtqy saýdany retteý» tórtinshi baǵyty sheńberinde ÁMAT, JJM, kómir, elektr energııasy, dárilik preparat baǵasynyń ósýin tejeý josparlanýda. Bul rette ÁMAT-qa saýda ústemesiniń 15% saqtalýyn baqylaýdy júzege asyrý jónindegi zańnamalyq fýnktsııany tolyqqandy iske asyrý qamtamasyz etiledi.
«Júıeli sharalar» JJM naryǵyndaǵy ónimsiz deldaldardyń sanyn azaıtýdy kózdeıdi. Halyqtyń áleýmettik osal tobyn qoldaý úshin kommýnaldyq tólem tóleý kezinde olardy jeke topqa bólý praktıkasy engizilip, taýarlyq gazdyń bólshek saýda baǵasy saralanady. Sondaı-aq azamattardyń áleýmettik ámııanyna áleýmettik járdemaqylar men tólemderdi esepteýdiń jáne áleýmettik ámııan arqyly áleýmettik kómek alýshylarǵa ÁMAT-ty jeńildikti/tómendetilgen baǵamen satýdyń jańa tetikteri engiziledi.
«Inflıatsııa men onyń komponentterin nysanaly deńgeıde ustap turý; taýar tapshylyǵyna jol bermeý; baǵany birtindep turaqtandyrýǵa jáne bıznes ahýaldy jaqsartýǵa yqpal etý; negizgi azyq-túlik jáne azyq-túlik emes taýar boıynsha ekonomıkanyń ózindik jetkilikti bolýyn qamtamasyz etý maqsaty qoıylyp otyr», - dedi mınıstr.
