Áleýmettik álsiz qorǵalǵan turǵyndarǵa tsıfrlyq prıstavkalar respýblıkalyq bıýdjetten satyp alynyp beriledi - L. Tanysbaı
ASTANA. 28 jeltoqsan. QazAqparat /Qanat Mámetqazyuly/ - Áleýmettik álsiz qorǵalǵan turǵyndarǵa tsıfrlyq prıstavkalar respýblıkalyq bıýdjetten satyp alynyp beriledi.
Búgin QR Parlamenti Senatynyń jalpy otyrysynda «Teleradıo habarlaryn taratý týraly» Qazaqstan Respýblıkasy zań jobasy boıynsha baıandaǵan QR Baılanys jáne aqparat vıtse-mınıstr Lázzat Tanysbaı osylaı málimdedi.
Vıtse-mınıstrdiń aıtýynsha, zań jobasynda bekitilgen basty máseleniń biri - barlyq otandyq telearnalar tsıfrlyq júıege kóshýde ulttyq operatordyń sandyq paketine qosylýǵa kepildik alýy. Nátıjesinde jurtshylyq arasynda 100 paıyz tsıfrlyq taratý engizilip, olar otandyq arnalarmen qamtylady. «Sonymen qatar, sheteldik tájirıbe negizinde áleýmettik álsiz qorǵalǵan turǵyndarǵa tsıfrlyq prıstavkalar respýblıkalyq bıýdjetinen satyp alynyp beriledi», - deıdi L. Tanysbaı. Onyń aıtýynsha, zań arqyly sheteldik telearnalar da ýákiletti organdarda esepke turýǵa mindetti bolady. Al kabeldi operatorlar tek esepke qoıylǵan arnalardy ǵana tarata alady.
Sondaı-aq, tıisti ákimshilik-aýmaqtyq birlik aýmaǵynda dara jerseriktik jáne efırlik qabyldaǵysh qurylǵylaryn, turǵyn úı keshenderindegi kabeldik kommýnıkatsııany ornalastyrý boıynsha talaptardy belgileý quqyǵyn oblystardyń, respýblıkalyq mańyzy bar qalalardyń jáne Astananyń máslıhattary men ákimdikterine ǵana emes, qalalar men aýdandardyń jergilikti ókildi jáne atqarýshy organdaryna berý de kózdeledi. Budan bólek, telebaǵdarlamalardy taratý kezinde múgedekterdiń quqyqtary men múddelerin qorǵaý maqsatynda jańalyq sıpatyndaǵy telebaǵdarlamalardy sýrdoaýdarmamen nemese sýbtıtrler túrindegi aýdarmamen qamtamasyz etý qarastyrylady.
