Áleýmettanýshylar kongresinde qandaı máseleler sóz boldy
ASTANA. QazAqparat - Búgin Astanada ótken áleýmettanýshylardyń VI kongresinde áleýmettaný ǵylymynyń búgini men bolashaǵy sóz boldy, dep habarlaıdy QazAqparat tilshisi.
Búgingi forýmda kóterilgen basty taqyryptardyń biri - elimizdegi ýrbandalý protsesi. Onyń jarqyn dáleli retinde Astana keltirildi. Az ǵana ýaqyt ishinde elimizdiń ár óńirinen jınalǵan halyq tutas bir Elordany qurady.
Odan bólek, «Rýhanı jańǵyrý» baǵdarlamasynyń búkil qoǵamdy qamtýyndaǵy áleýmettaný ǵylymynyń róli sóz boldy. Óıtkeni Elbasy aıtqandaı, baǵdarlamanyń negizgi maqsaty - qoǵamdyq sanany ózgertý. Osy joldaǵy áleýmettanýshylardyń qyzmeti, qandaı jumystar atqarylǵany tilge tıek etildi.
Áleýmettanýshy mamandardyń aıtýynsha, atalǵan ǵylymnyń damýynyń taǵy bir dáleli - osydan 10-15 jyl buryn elimizde áleýmettik qyzmet kórsetetin 2-3 ortalyq qana bolsa, búginde 100-den asa áleýmettik ortalyq bar. Qazirde áleýmettaný ǵylym retinde de, qoǵamdy damytýda qoldanbaly sala retinde de qarqyndy damyp jatyr.
Osy salaǵa bólinetin memlekettik bilim granttarynyń sany da artyp keledi. Mysal keltirsek, elimizdegi bedeldi JOO-nyń biri - ál-Farabı atyndaǵy QazUÝ bıyl áleýmettaný mamandyǵyna 70-ke jýyq stýdentti 1 kýrsqa qabyldady.
Sonymen qatar, elimizde áleýmettanýshy sarapshy mamandar sany az emes. Búgingi forýmda sol mamandardyń aldynda qandaı máseleler tur, olar jumyspen qalaı qamtylady degen máseleler kóterildi. Árıne, jumys ornynyń bolýy ekonomıka jáne naryqpen tikeleı baılanysty. Degenmen, áleýmettik zertteýlerge qarasaq, sala mamandarynyń qoǵamda zertteıtin taqyryptary men máseleleri artyp keledi, demek bul sala mamandaryna suranys artpasa, kemimeıdi degen sóz.
Taǵy bir aıta ketetin dúnıe - elimizde jýyrda qolǵa alynǵan ózge tilden aýdarylatyn «Qazaq tilindegi 100 oqýlyq» jobasy boıynsha, búginde 17 oqýlyq aýdarylsa, sonyń 2-i - áleýmettaný ǵylymyna arnalǵan.
Otyrys barysynda zamanaýı áleýmettanýdyń aldynda turǵan qıyndyqtar jóninde de sóz qozǵaldy. Atap aıtsaq, áleýmettik ǵylymı jumystardyń sapasynyń syn kótermeýi, odan qaldy zertteý jumystarynyń az kólemde júrgizilýi, keń kólemde júrgizilgenniń ózinde qoǵamdyq qoldanysqa enbeýi - saladaǵy ózekti problemalar. Osyǵan baılanysty shetelden kelgen sarapshy mamandarmen ózara tájirıbe almasý máselesi kóterildi.
Buǵan deıin habarlaǵanymyzdaı, búgin elordada áleýmettanýshylardyń VI kongresi ótti. Oǵan elimizdiń barlyq óńirinen 200-den asa áleýmettaný mamandarymen qatar, Reseı, Túrkııa, Japonııa, BAÁ, Germanııa elderinen delegattar qatysty.
