Áleýmettik saýalnama – qazaqstandyqtar Prezıdentke joǵary deńgeıde senim bildiredi

Áleýmettik saýalnama 2026 jylǵy 20 shilde men 6 tamyz aralyǵynda Demokratııa ınstıtýtynyń qarjylandyrýy negizinde júrgizildi.

— Іrikteme kólemi 8000 respondent. Saýalnamaǵa 17 oblys pen 3 respýblıkalyq mańyzy bar qala — Astana, Almaty jáne Shymkent qalalarynyń 18 jastan asqan respondentteri qatysty, — delingen habarlamada.

Zertteý 18-29 aralyǵyndaǵy jastardyń Prezıdentke joǵary deńgeıde senim bildiretinin anyqtady. Osy jas tobyndaǵylardyń 90,1%-y («ıá» jáne «ıá deýge bolady» jaýaptarynyń ortaq kórsetkishi) Prezıdentke senim artatynyn bildirdi. Bul saýalnamaǵa qatysqandardy jas sanattary boıynsha taldaǵandaǵy eń joǵary kórsetkish.

— Bilim deńgeıi — saıası senimniń mańyzdy kórsetkishteriniń biri: azamattardyń bilim deńgeıi neǵurlym joǵary bolsa, olardyń Prezıdentke degen senimi de soǵurlym joǵary. Mysaly bilim deńgeıi tómenirek respondentter arasynda senim 81,8% bolsa, joǵary bilimdi azamattar arasynda bul kórsetkish 89,7%-ǵa jetip otyr.

Halyqtyń Memleket basshysyna degen joǵary senimi memlekettiń damý baǵytyn joǵary deńgeıde qoldaýymen tyǵyz baılanysty. Memlekettiń damý baǵytyna da halyqtyń basym bóligi qoldaý bildirip otyr. Atap aıtqanda 81,5% qazaqstandyq memleket durys baǵytta damyp otyr dep sanaıdy, — delingen habarlamada.

Eldiń damý baǵytyn qoldaıtyndardyń áleýmettik-demografııalyq portreti Prezıdentke senim bildiretin qazaqstandyqtardyń portretine uqsas.

— 18-29 aralyǵyndaǵy jastar memlekettiń damý baǵytyn eń joǵary deńgeıde qoldaıtyn top. Olardyń 85,4%-y memleket durys baǵytta damyp keledi dep sanasa, bul kórsetkish jas shamasy ulǵaıǵan saıyn tómendeı túsedi. Kórsetkish tómendegenine qaramastan, ol báribir joǵary deńgeıde saqtala otyryp, jasy eń úlken respondentter tobynda 76,9% (60 jastan asqandar), — delingen habarlamada.

Prezıdentke senim bildiretinder arasynda bilim deńgeıi boıynsha joǵary bilimdiler eń joǵary kórsetkishti qurasa, Qazaqstannyń damý baǵytyn durys dep sanaıtyndardyń da eń joǵary úlesi joǵary bilimdi azamattar arasynda tirkeledi (86%).

— Jalpy alǵanda, Prezıdentke degen senim deńgeıine de, eldiń damý baǵytyn qoldaý deńgeıine de áser etetin negizgi faktorlar retinde respondentterdiń jas ereksheligi men bilim deńgeıi anyqtalyp otyr. Sonymen qatar, bir qyzyǵy, zertteý nátıjeleri Prezıdentke degen senim men eldiń damý baǵytyn qoldaýǵa qatysty erler men áıelderdiń, sondaı-aq qala men aýyl turǵyndarynyń kózqarastarynda eleýli aıyrmashylyqtar joq ekenin kórsetedi.

Zertteý nátıjeleri eldiń áleýmettik-saıası damý baǵytyn barynsha oń baǵalaıtyn azamattardyń áleýmettik sanatyn anyqtaýǵa múmkindik berdi. Olar memlekettik bastamalardy odan ári ilgeriletýdiń áleýetti tiregi bola alady. Bul sanatty jas qazaqstandyqtar men joǵary bilimdi azamattar. Respondentterdiń jynysy men turǵylyqty jeri (aýyl/qala) aıtarlyqtaı áser etetin faktor retinde qarastyrylmaıdy, — delingen habarlamada.

Mundaı úrdis jastar arasynda memleketke ınstıtýtsıonaldyq senim deńgeıiniń joǵary ekenin, qazirgi qoǵamdyq-saıası kún tártibine kóbirek qyzyǵýshylyq tanytatynyn, sondaı-aq olardyń eldiń odan ári ózgerýi men damýyna qatysty úmitteriniń joǵary ekenin kórsetýi múmkin.

Eldiń qazirgi damý baǵytyn qoldaıtyn azamattar arasynda joǵary bilimdilerdiń basym bolýy emotsıonaldy senimnen ratsıonaldy senimge kóshýdi kórsetedi. Azamattar naqty oń ózgeristerdi kórip, reformalardyń nátıjeleriniń óz ómirlerine jaǵymdy áserin sezingendikten Prezıdenttiń baǵytyn qoldaıdy.

Prezıdentke degen qoǵamdyq senimniń joǵary deńgeıi men eldiń damý baǵytyna berilgen oń baǵanyń úılesýi qoǵamdaǵy joǵary deńgeıdegi konsolıdatsııany, áleýmettik optımızmdi jáne qoǵamdyq-saıası turaqtylyqtyń áleýetin kórsetýi múmkin.

Aıta ketelik qazaqstandyqtar ómir sapasyn oń baǵalaıtyny týraly jazǵan edik.