Aleshka Sımkıch Qazaqstandyqtarǵa Shengen vızasyn rásimdeý boıynsha keńes berdi
ASTANA. KAZINFORM — Qazaqstandyq stýdentterge Eýropa elderinde oqý nemese uzaq merzim bolý josparlanǵan jaǵdaıda vızalyq rásimderdi erte bastaý qajet. Al qysqa merzimdi týrıstik vıza alý salystyrmaly túrde jeńil rásim sanalady. Degenmen onyń ózinde qujattar men qarjylyq talaptar tolyq oryndalýy tıis.
Qazaqstandaǵy Eýropalyq odaqtyń elshisi Aleshka Sımkıchtyń aıtýynsha, ádette 5 kúndik Shengen vızasy tez beriledi. Al uzaq merzimdi turýǵa ruqsat alý úshin áldeqaıda kóp ýaqyt qajet. Sebebi mundaı ruqsattardy elshilikter emes, stýdent nemese ótinish berýshi turatyn eldegi jergilikti quzyrly organdar rásimdeıdi.
Elshi stýdentter tarapynan jıi aıtylatyn shaǵymdardyń biri — vızanyń tym qysqa merzimge berilýi ekenin atap ótti. Onyń aıtýynsha, bul jaǵdaı kóbine ýnıversıtetterdiń oqý týraly resmı rastaýdy kesh berýimen baılanysty.
— Stýdentter qujattardy alǵan boıda birden uzaq merzimdi vıza rásimin bastaýǵa tyrysady. Biraq bul protsess birden sheshilmeıdi. Stýdent Eýropada oqıtynyn bilgen sátten bastap vızalyq ótinishti birden berip, barlyq qujatty aldyn ala daıyndaýy qajet, — dep jaýap berdi Aleshka Sımkıch jýrnalıster suraǵyna.
Sonymen qatar ol birqatar EO múshe memleketterde qysqa ýaqyt ishinde júzdegen ótinish túsip, olardy óńdeý qıyndyq týdyratynyn da mysal retinde keltirdi.
EO elshisiniń aıtýynsha, týrıstik vıza alý jeńilirek bolǵanymen, uzaq merzimdi oqý nemese turý úshin rásimder kúrdelirek jáne ýaqytty kóbirek talap etedi. barlyq rásimder ýaqytynda bastalǵan jaǵdaıda protsess áldeqaıda jeńil ótedi dep atap ótti.
Buǵan deıin EO elshisi vızalyq rásimderdi jeńildetý týraly kelisimniń qashan kúshine enetinin aıtty.
