Aleppoda 2 mıllıon adam sýsyz qaldy
ASTANA. QazAqparat - BUU balalar qory ıÝNISEF Aleppoda bolǵan qııan-keski urystardan soń 2 mıllıonannan astam adam sýsyz qalǵandyǵyn málim etti, dep habarlaıdy kyrtag.kg.
Halyqaralyq uıym málimetteri boıynsha, keminde bir sý tartqysh munaraǵa zaqym kelgen. Al, osy aımaqta bolyp jatqan qaqtyǵystar ony jóndeýge múmkindik bermeı otyr.
Buǵan qosa, qalanyń shyǵys aýdandaryna sý jiberetin stantsııa jumysy kóterilisshiler tarapynan májbúrli túrde toqtatylǵan.
ıÝNISEF ókilderi qalyptasqan jaǵdaıdyń túrli aýrýlardyń shyǵýyna túrtki bolatyndyǵyn aıtyp otyr. Óıtkeni, adamdar endi qudyqtardaǵy las sý men ózge de sý kózderin paıdalana bastaıdy.
Ótken táýlikterde Aleppodaǵy kóterilisshiler baqylap otyrǵan aýdandarǵa áýeden dúrkin-dúrkin soqqylar jasaldy. Beısenbi kúni AQSh pen Reseıdiń Sırııa boıynsha tatýlasý baǵytyndaǵy kelissózderi taǵy da nátıjesiz aıaqtaldy. Sátsiz aıaqtalǵan kelissózderden soń BUU-nyń arnaıy elshisi Staffan de Mıstýra kezdesýdiń óte qıyn bolǵandyǵyn aıtty.
Sarapshylar jaqyn arada jaǵdaıdyń jaqsy jaǵyna qaraı ózgeretindigine kúmánmen qaraıdy.
