Álemniń úzdik tennısshileri 2027 jyly Astanada bas qosady
ASTANA. KAZINFORM — 2027 jyly Qazaqstanda ITTF World Table Tennis Championships Finals Astana ústel tennısinen álem chempıonaty ótedi, dep habarlaıdy Týrızm jáne sport mınıstrliginiń baspasóz qyzmeti.
Saltanatty rásim barysynda Qazaqstanǵa ITTF World Table Tennis Championships Finals Astana 2027 ústel tennısinen álem chempıonatynyń fınaldyq kezeńin ótkizý quqyǵy resmı túrde berildi.
Tıisti kelisimge Astanada qol qoıylyp, qujatqa sáıkes elorda 2027 jylǵy ústel tennısinen álem chempıonatynyń fınaldyq kezeńin qabyldaıtyn qala retinde resmı túrde bekitildi. Bul doda halyqaralyq ústel tennısi kúntizbesindegi eń mańyzdy jarystardyń biri sanalady.
Rásimge Halyqaralyq ústel tennısi federatsııasynyń (ITTF) prezıdenti Petra Serlıng, Qazaqstan Respýblıkasynyń Týrızm jáne sport mınıstri Erbol Myrzabosynov, Astana qalasynyń ákimi Jeńis Qasymbek, Qazaq ulttyq sport ýnıversıtetiniń quryltaıshysy Nurasyl Medeý jáne Qazaqstan ústel tennısi federatsııasynyń prezıdenti Danııar Ábilǵazın qatysty.
Álem chempıonatyn ótkizý quqyǵyna ıe bolý halyqaralyq sport uıymdarynyń Qazaqstanǵa degen seniminiń artyp kele jatqanyn kórsetedi.
Bul elimizdiń álemdik deńgeıdegi iri sporttyq jarystardy joǵary deńgeıde uıymdastyra alatyn memleket ekenin taǵy bir márte dáleldeıdi. 2027 jylǵy álem chempıonatyna dúnıe júziniń eń myqty sportshylary, ulttyq federatsııalar men halyqaralyq uıymdardyń ókilderi, myńdaǵan jankúıer jáne álemdik buqaralyq aqparat quraldarynyń ókilderi keledi dep kútilip otyr.
Sondaı-aq, bıyl elimizde tuńǵysh ret álemdik World Table Tennis (WTT) týrynyń eń bedeldi jarystarynyń biri — WTT Star Contender Astana — President’s Cup 2026 týrnıri uıymdastyrylatynyn esterińizge sala keteıik. Jarys 2026 jylǵy 15–20 qyrkúıek aralyǵynda ótedi. Bul jarys World Table Tennis (WTT) uıymynyń resmı jarystar kúntizbesine engen jáne álemdik kásibı týrdaǵy eń bedeldi kezeńderdiń biri bolyp sanalady.
WTT Star Contender serııasynyń týrnırleri jylyna nebári alty ret ótkiziledi. Qazaqstan osyndaı joǵary deńgeıdegi jarysty qabyldaý quqyǵyna alǵash ret ıe bolyp otyr.
Týrnırge álemniń 30-dan astam elinen shamamen 190 sportshy qatysady. Olardyń qatarynda Qytaı, Japonııa, Koreıa Respýblıkasy, Frantsııa, Germanııa, Brazılııa, Shvetsııa, Danııa, Taıvan, Gonkong, Úndistan, Sıngapýr, Mysyr, Portýgalııa, Horvatııa, Slovenııa, Rýmynııa, Qazaqstan jáne basqa da memleketterdiń ókilderi bar.
Sonymen qatar, jarysqa Qazaqstannan 20-ǵa deıin sportshy qatysady dep josparlanyp otyr. Týrnırdi Nomad Table Tennis Academy uıymy World Table Tennis (WTT) uıymymen birlesip, Qazaqstan Respýblıkasynyń Týrızm jáne sport mınıstrligi men Astana qalasy ákimdiginiń Dene shynyqtyrý jáne sport basqarmasynyń qoldaýymen ótkizedi.
— WTT Star Contender Astana — President’s Cup 2026 jáne ITTF World Table Tennis Championships Finals Astana 2027 sekildi halyqaralyq deńgeıdegi eki iri jarystyń Qazaqstanda ótýi elimizdiń álemdik ústel tennısiniń mańyzdy ortalyqtarynyń birine aınalyp kele jatqanyn aıǵaqtaıdy. Bul — halyqaralyq qaýymdastyqtyń Qazaqstannyń uıymdastyrýshylyq áleýetine bergen joǵary baǵasy ǵana emes, sonymen qatar sport ınfraqurylymyn damytýǵa, týrızmdi ilgeriletýge, otandyq sportshylardy daıarlaýǵa jáne elimizdiń halyqaralyq bedelin nyǵaıtýǵa serpin beretin mańyzdy qadam, — delingen mınıstrlik habarlamasynda.
Osyǵan deıin Ýımbldon týrnıri qazaqstandyq tennısshiler úshin sátsiz bastalǵanyn jazdyq.
