Álemniń úzdik stýdent shahmatshylary 2026 jyly Almatyda bas qosady
ASTANA. KAZINFORM — Qazaqstanda Halyqaralyq shahmat federatsııasynyń (FIDE) qoldaýymen 2026 jyldyń eń iri týrnırleriniń biri — ýnıversıtetter arasyndaǵy komandalyq álem chempıonatynyń fınaly ótedi. Bul týraly Qazaqstannyń shahmat federatsııasy málim etti.
Qazaqstan shahmat federatsııasynyń prezıdenti Tımýr Týrlov óziniń avtorlyq baǵanynda atap ótkendeı, FIDE World University Team Chess Championship 2026 tamyz aıynda Almatyda ótedi jáne ol jahandyq deńgeıdegi stýdenttik shahmattyń naǵyz jańarýyna aınalmaq.
— Bul álemdik shahmattaǵy kásibı qaýymdastyqtyń 2021 jyldan beri kútken «stýdenttik formatty» tolyqqandy qaıta paıymdaýy bolmaq. Esterińizge sala keteıin, sol jyly pandemııa kezinde 1st World University Online Rapid Championship ótken bolatyn, biraq ol tolyǵymen onlaın formatta uıymdastyryldy. Endi bul format naǵyz jahandyq aýqymda qaıta jańǵyryp, onyń sheshýshi kezeńin ótkizý bizge senip tapsyryldy, — dep jazdy QShF prezıdenti.
Onyń aıtýynsha, mamyr aıynda Soltústik jáne Ońtústik Amerıka, Eýropa, Afrıka jáne Azııa elderiniń jetekshi joǵary oqý oryndary baq synaǵan irikteý kezeńderi ótti.
Nátıjesinde alǵashqy 8 qatysýshy anyqtaldy: Sent-Lýıs ýnıversıteti, Dallastaǵy Tehas ýnıversıteti, Oral taý-ken ýnıversıteti, Afıny ulttyq tehnıkalyq ýnıversıteti, Vebster ýnıversıteti, Chılı ýnıversıteti, Gýnadarma ýnıversıteti jáne ál-Farabı atyndaǵy Qazaq ulttyq ýnıversıteti.
QShF prezıdenti qalǵan 8 qatysýshynyń tikeleı wild card alatynyn atap ótti.
Búgingi tańda olar: Kembrıdj ýnıversıteti, Oksford ýnıversıteti, Garvard ýnıversıteti, Pekın ýnıversıteti jáne respýblıkalyq irikteý arqyly joldama alǵan Qazaq ulttyq sport ýnıversıteti. Taǵy úsh wild card ıegeriniń aty keıinirek jarııalanady.
— Stýdenttik shahmatty «oıynǵa» qaıta qosýǵa jáne osy jahandyq úderisti Qazaqstannyń belsendi rólin aıqyndaýǵa bul taptyrmas múmkindik ekeni qazirdiń ózinde túsinikti, — deıdi Tımýr Týrlov.
Eske sala keteıik, álemniń 19 elinen kelgen oqýshylar baq synaǵan Almatydaǵy shahmat dodasy óz máresine jetken bolatyn.
