Álemniń úzdik shahmatshylary Asaýbaevany qıyn qarsylas dep tanydy
ASTANA. KAZINFORM — Cairns Cup-2026 sýpertýrnırine qatysyp jatqan shahmatshylar «Armageddon» kezeńindegi eń qıyn qarsylasyn atady. Olardyń tórteýi de qazaqstandyq shahmatshy Bıbisara Asaýbaevany nusqady, dep habarlaıdy Sports.kz.
Sent-Lýıs shahmat qoǵamynyń baspasóz qyzmeti úzdik shahmatshylar arasynda «Cairns Cup-2026 týrnırindegi Armageddonda eń qıyn qarsylas kim bolar edi?» degen saýalnama júrgizgen. Grekııalyq Stavrýla Tsolakıdý, ýkraınalyq Anna Mýzychýk, úndistandyq Hampı Konerý jáne amerıkalyq Elıs Lı Bıbisara Asaýbaevany atady.
Máselen, Tsolakıdý «Men Bıbisarany tańdar edim. Ol jyldam shahmatta óte myqty» dep atap ótti.
Al Mýzychýk «Bıbisarany atar edim. Ol ýaqyt baqylaýy qysqa partııalarda óte jaqsy oınaıdy» dedi.
Konerý «Menińshe, bul — Bıbisara» dep qysqa qaıyrdy.
Sondaı-aq amerıkalyq Elıs Lı: «Bálkim, Bıbisara shyǵar. Óıtkeni ol blıtsten álemniń úsh dúrkin chempıony» dedi.
Mýzychýk — jyldam shahmat túrlerinen álemniń úsh dúrkin chempıony. Konerý rapıdten álem chempıonatynda eki ret jeńiske jetken. Al Elıs Lı óz jas sanattarynda kadetter men jasóspirimder arasyndaǵy álem chempıonatynda úsh ret top jarǵan. Tsolakıdý da jasóspirimder arasyndaǵy álem chempıonatynda úsh ret jeńimpaz atanǵan. Ol 2013 jyly 14 jasqa deıingiler, 2015 jyly 16 jasqa deıingiler jáne 2016 jyly 18 jasqa deıingiler arasynda altyn medal ıelengen.
Búgin AQSh-tyń Sent-Lýıs qalasynda Cairns Cup týrnıriniń sońǵy, segizinshi týry ótedi. Bıbisara Asaýbaeva úshinshi orynda tur. Ol týrnır kóshbasshysy, qytaılyq Tan Chjýnımen sheshýshi kezdesý ótkizedi.
Shahmattaǵy Armageddon — matchtaǵy esep teń bolǵan jaǵdaıda jeńimpazdy anyqtaý úshin oınalatyn sheshýshi partııa. Munda aq fıgýralar kóbirek ýaqyt alady: ádette aqtarǵa 5 mınýt, qaralarǵa 4 mınýt beriledi. Alaıda aqtar tek jeńiske jetken jaǵdaıda ǵana matchta jeńimpaz atanady. Qaralarǵa ýaqyt az beriledi, biraq partııa teń aıaqtalsa, olar avtomatty túrde match jeńimpazy dep tanylady.
Aıta keteıik, Bıbisara Asaýbaeva Halyqaralyq shahmat federatsııasy (FIDE) belgilegen alǵashqy FIDE Excellence Awards syılyǵyna úmitker retinde tirkeldi.
