Álemniń úzdik Dota 2 juldyzdary Astanada 1 mln AQSh dollary úshin baq synaıdy

Jeńis jolynda Qytaı, Qazaqstan, Ońtústik-Shyǵys Azııa, Ońtústik Amerıka, Shyǵys Eýropa jáne ózge de óńirlerden kelgen 16 komanda baq synaıdy. Qatysýshylar qatarynda álem chempıondary, The International týrnıriniń fınalısteri, sondaı-aq halyqaralyq deńgeıdegi eń iri jarystarda tanylǵan tájirıbeli kıbersportshylar bar.

Dota 2 — derbes kompıýterge arnalǵan MOBA (Multiplayer Online Battle Arena) janryndaǵy komandalyq strategııalyq oıyn. Ár matchta bes oıynshydan quralǵan eki komanda vırtýaldy alańda ózara baq synaıdy. Jeńiske jetý úshin oıynshylar qarsylastyń negizgi bazasyn joıyp, óz bazasyn qorǵaýy tıis. Bul oıyn strategııalyq oılaý qabiletin, úılesimdi komandalyq jumysty jáne jedel sheshim qabyldaýdy talap etedi.

Qazaqstan namysyn týrnırde elimizdiń jetekshi Dota 2 komandalarynyń biri Rune Eaters qorǵaıdy. Komanda quramynda Danııal Álibaı (xsvampire), Ábdimálik Saılaý (Malik), Álim Bespaev (aik), Aıbek Toqaev (naive-) jáne Nıkıta Ostahov (Nicky`Cool) óner kórsetedi. Astanada qazaqstandyq komanda jergilikti jankúıerlerdiń qoldaýymen álemniń myqty ujymdaryna qarsy oınaıdy.

Týrnırdiń toptyq kezeńinde 16 komanda tórt topqa bólinedi. Ár toptaǵy tórt komanda tartysqa túsedi. Kezdesýler best-of-three formatynda ótedi, ıaǵnı eki oıynda jeńiske jetken komanda kelesi kezeńge joldama alady.

Pleı-off kezeńi tikeleı irikteý júıesimen uıymdastyrylady: serııada jeńilgen komanda jarysty aıaqtaıdy. Al grand-fınalda komandalar úsh ret jeńiske jetkenge deıin oınaıdy. Osylaısha chempıon eń kóbi bes oıynnyń qorytyndysy boıynsha anyqtalady.

MOBA PC dıstsıplınasy boıynsha Dota 2 týrnıri 2-5 tamyz aralyǵynda Astanadaǵy Jaqsylyq Úshkempirov atyndaǵy Jekpe-jek saraıynda ótedi. 

Aıta ketelik «Bolashaq oıyndary — 2026»: Astanadaǵy týrnırge 50-den asa elden adam keledi.