Álemniń úzdik aspazdary Shymkentte bas qosty

ShYMKENT. KAZINFORM — Shymkent qalasynda Naýryz merekesin toılaý aıasynda DamDastour halyqaralyq gastronomııa festıvali ótti. 

Bul is-shara megapolıstegi eń jarqyn ári aýqymdy mádenı oqıǵalardyń birine aınaldy. Aıta ketý kerek, festıval 2026 jylǵa arnalǵan negizgi is-sharalar kúntizbesine engizilip, Qazaqstandaǵy oqıǵaly týrızmniń mańyzdy jobalarynyń biri retinde qarastyrylady.

Birneshe kún boıy Ál-Farabı atyndaǵy ortalyq alań álemniń túrli elderiniń ashanalaryn toǵystyrǵan halyqaralyq gastronomııa keńistigine aınaldy.

Festıvalge Belgııa, Shveıtsarııa, Frantsııa, Serbııa, Túrkııa, Grýzııa, Ázerbaıjan, Reseı, Qyrǵyzstan jáne Ózbekstannan kelgen halyqaralyq baıqaýlardyń jeńimpazy atanǵan tanymal bas aspazdar qatysty. Olar avtorlyq taǵamdaryn usynyp, kásibı sheberlik sabaqtaryn ótkizip, festıvaldi halyqaralyq gastronomııalyq baılanys ornatatyn alańǵa aınaldyrdy.

Festıval aıasynda qoǵamdyq tamaqtaný oryndary arasynda baıqaý uıymdastyryldy. Qazylar alqasynyń sheshimimen «Eń úzdik palaý» atalymynda Grand Gondel Hills meıramhanasy jeńiske jetse, «Eń dámdi samsa» atalymynda Qazaq Samsa meıramhanasy úzdik dep tanyldy. Al «Úzdik ulttyq taǵam» boıynsha «Pontos» meıramhanasy jeńimpaz atandy. «Kamal ata» kafesi belsendi qatysqany úshin arnaıy marapatqa ıe boldy.

Jalpy festıvalge qaladaǵy 50-ge jýyq meıramhana qatysyp, ulttyq jáne álem ashanasynyń san alýan taǵamdaryn usyndy. Naýryzdyń basty taǵamy — naýryz kóje de daıyndaldy.

Festıval mazmundy mádenı baǵdarlamasymen de este qaldy: túrli baıqaýlar, ónerpazdardyń óner kórsetýi, batyrlar shoýy, tsırk qoıylymdary, motosherý, avtokórme jáne qolónershiler jármeńkesi uıymdastyryldy.

Festıval Shymkenttiń týrıstik áleýeti joǵary ekenin kórsetip, oqıǵaly týrızmdi damytýǵa jáne ulttyq ashanany nasıhattaýǵa zor úles qosty. 

Aıta ketelik Naýryz kóje daıyndaýǵa qansha qarjy kerek ekenin jazǵan edik.