Álemniń úsh dúrkin chempıony bolýǵa tyrysamyn - Nazym Qyzaıbaı

ALMATY. KAZINFORM – Olımpıada júldegeri Nazym Qyzaıbaı Almatyǵa ushyp keldi. Almatylyqtar sportshyny saltanatty túrde kútip aldy.

BAQ ókilderiniń suraǵyna jaýap bergen Nazym Qyzabaı jarystan keıingi óz áseri týraly baıandady.

- Jalpy Olımpıada jaqsy ótti. Jattyqtyrýshymmen jaqsy daıyndalyp, qolaǵa qol jetkizdik. Halyqtyń kútip alǵanyna qarap, jeńiske jetkenimdi endi sezinip jatyrmyn. Jankúıerlerge myń alǵys. Barsha Qazaqstannyń qoldaýyn sezindim. Parıjde júrip, eń birinshi anamnyń tamaǵyn ańsadym, - dedi ol.

Sondaı-aq, Olımpıada júldegeri álemniń úsh dúrkin chempıony bolýǵa maqsat qoıǵanyn taǵy da atap ótti.

- Aldaǵy jospar týraly aıtar bolsam, Olımpıadadan endi ǵana keldik, sondyqtan biraz demalamyn. Ári qaraı bapkerimmen aqyldasyp, sheshim qabyldaımyz. Biraq bizde úsh dúrkin álem chempıony joq. Sondyqtan tarıhta iz qaldyrý úshin barymdy salamyn jáne soǵan qol jetkizemin dep oılaımyn, - dedi Nazym Qyzaıbaı.

Eske salaıyq, 7 tamyz kúni Nazym Qyzaıbaı Olımpıadanyń qola júldesin jeńip aldy.