Álemniń túkpir-túkpirinen IT mamandaryn Astana men Alatau City-ge tartý josparlanyp otyr

ASTANA. KAZINFORM — Network School negizin qalaýshy ári bas dırektory, Coinbase krıptovalıýta bırjasynyń burynǵy tehnıkalyq dırektory Baladjı Shrınıvasan álemniń túkpir-túkpirinen IT mamandaryn Astana men Alatau City-ge tartý jospary týraly aıtty. Onyń komandasy tehnologııalyq bilim berýdi damytyp, qazaqstandyqtarǵa tsıfrlyq salada jumys tabýǵa kómektesýdi jáne halyqaralyq tehnologııalyq qaýymdastyq qurýdy kózdep otyr.

 Baladjı Shrınıvasan
Foto: Tatıana Korıakına/Kazinform

Kásipker bul bastamalary týraly 22 qazanda Shymkentte ótken Qazaqstannyń IX jahandyq ınvestıtsııalyq dóńgelek ústelinde (KGIR 2026) aıtty.

Buǵan deıin Shrınıvasan Coinbase krıptovalıýta bırjasynyń tehnıkalyq dırektory qyzmetin atqaryp, Andreessen Horowitz venchýrlik kompanııasynda bas seriktes bolǵan. Qazir ol tehnologııalyq bilim berýdi, kásipkerlikti jáne tsıfrlyq ekonomıkaǵa mamandar daıarlaýdy ushtastyratyn Network School halyqaralyq jobasyn damytyp keledi.

Qazaqstanda bul bastama Astana Hub alańynda usynylǵan. Network School qatysýshylary zamanaýı tehnologııalardy meńgerip, kásibı daǵdylaryn jetildire alady jáne krıptovalıýta salasyn qosa alǵanda, qashyqtan jumys isteýdi úırenedi.

Kásipkerdiń negizgi maqsatynyń biri — Qazaqstanda halyqaralyq tehnologııalyq qaýymdastyq qurý. Ol úshin túrli eldiń mamandaryn biriktirip, jergilikti turǵyndarǵa IT salasynan jumys tabýǵa kómektesýdi josparlap otyr.

— Biz álemniń túkpir-túkpirinen mamandar tartý arqyly Astanany halyqaralyq tehnologııalyq ortalyq retinde damytýǵa atsalysýdy josparlap otyrmyz. Jergilikti turǵyndarǵa IT salasynan jumys tabýǵa kómektesemiz. Biz bul tásildi „Emtıhan tapsyr da, jumysqa ornalas“ dep ataımyz, — dedi Baladjı Shrınıvasan.

Kásipkerdiń aıtýynsha, bul model mamandardyń praktıkalyq daǵdylaryn damytýǵa negizdelgen. Sonyń arqasynda olar qaı jerde turatynyna qaramastan, tehnologııalyq salada jumys isteýge múmkindik alady.

Network School Astanamen qatar Alatau City qalasyn damytýǵa da atsalysýdy kózdep otyr. Tehnologııalyq kásipkerlikke baǵyttalǵan jańa qala úshin halyqaralyq mamandar qaýymdastyǵyn qalyptastyrý mańyzdy baǵyttardyń biri bolmaq.

— Biz startaptar qalasy sanalatyn Alatau City-ge jańa turǵyndardy tartýǵa kómektesemiz. Ol úshin álemniń túkpir-túkpirinen talantty mamandardy shaqyrýdy josparlap otyrmyz, — dedi Network School negizin qalaýshy.

Shrınıvasan óz bastamalaryn Qazaqstannyń tsıfrlyq damýyna baılanysty aýqymdy ózgeristerdiń bir bóligi retinde qarastyrady. Onyń aıtýynsha, halyqaralyq ınvestıtsııalyq forýmǵa qatysýyna osy taqyrypqa degen qyzyǵýshylyǵy da sebep bolǵan.

— Meniń oıymsha, bul — Qazaqstandy tsıfrlyq memleketke aınaldyrýǵa úles qosyp júrgen adamdarmen tanysýǵa jaqsy múmkindik. Bul taqyryp maǵan da óte qyzyq. Biz áýeli tehnologııalyq habty, odan keıin krıptoqalany, al bolashaqta tsıfrlyq memleketti damytýdy josparlap otyrmyz, — dedi kásipker.

Forým barysynda Kazinform tilshisi Network School komandasynyń Shymkenttegi IT mamandarymen yntymaqtastyq ornatý múmkindigin qarastyryp otyrǵan-otyrmaǵanyn surady. Baladjı Shrınıvasan bul megapolıske alǵash ret kelgen.

Kásipker qazaqstandyq jastardyń fızıka páninen halyqaralyq olımpıadalardaǵy jetistikterine de nazar aýdardy. Onyń pikirinshe, álemdik deńgeıde básekege qabiletti mamandar iri tehnologııalyq ortalyqtarda ǵana emes, eldiń basqa qalalarynda da jumys isteı alady.

— Men Shymkentke alǵash ret keldim. Munda talantty adamdar kóp dep oılaımyn. Jergilikti mamandardy, sonyń ishinde tehnologııa salasyndaǵy kadrlardy tartýymyz múmkin. Munda álemdik deńgeıde básekege qabiletti adamdar bar jáne biz olardy jumysqa tarta alamyz, — dedi Baladjı Shrınıvasan.

KGIR 2026 forýmy aıasynda Baladjı Shrınıvasan Qazaqstannyń áleýmettik-ekonomıkalyq jáne ındýstrııalyq jobalaryn júzege asyrýǵa qosqan úlesi úshin marapattalǵan ınvestorlardyń qataryna endi.

Eske salaıyq, buǵan deıin Baladjı Shrınıvasan Qazaqstannyń álemdegi jetekshi tehnologııalyq ortalyqtardyń birine aınalýyna barlyq múmkindik bar ekenin aıtty. Onyń sózinshe, Astana damý qarqyny jaǵynan Dýbaı men Sıngapýrdyń jetistigin qaıtalaı alady.