Álemniń ozyq tehnologııalyq kompanııalary qazaq tiliniń áleýetin moıyndaı bastady – Prezıdent

ASTANA. KAZINFORM – Qazaq tili zaman talabyna saı damyp kele jatyr. Memleket basshysy Qasym-Jomart Toqaev «Qazaq tili» qoǵamynyń H quryltaıynda tsıfrlyq platformalarǵa qazaq tilin engizý jumystaryn jalǵastyrýdy tapsyrdy.

«Qazaq tili» qoǵamynyń H quryltaıy
Foto: Soltan Jeksenbekov / Kazinform

– Qazaq eli barda qazaq tili tuǵyrdan túspeıdi. Ótken zamandarda saıası qysym bolǵan kezde ana tilimiz ádebıetshiler men til mamandarynyń, jýrnalısterimizdiń, zııaly qaýym men qarapaıym azamattardyń arqasynda aman qaldy da, óziniń damýyn toqtatqan joq. Bul – tipti, qazaq tiliniń ómirsheńdigi biregeı degen sóz. Al qazir tilimizdiń keleshegine eshqandaı qaýip tónip turǵan joq dep anyq aıtýǵa bolady, – dedi Memleket basshysy.

Búginde qazaq tili ozyq tehnologııalar salasyna keń aýqymda enip, zaman talabyna saı damyp kele jatyr.

Elimizde san alýan tsıfrlyq platformalar tabysty jumys istep tur. Onyń bári qazaq tilinde qyzmet kórsetetin boldy.

– Ana tilimizdiń áleýetin álemniń ozyq tehnologııalyq kompanııalary da moıyndaı bastady. Máselen, Open.AI kompanııasy júrgizgen zertteýge sáıkes qazaq tili sońǵy úsh jylda jasandy ıntellekt júıesindegi qoldanys aıasy qarqyndy keńeıip jatqan tilderdiń qataryna kirgen. Al Yandeh kompanııasy óziniń bir belgili ónimin byltyrdan beri qazaq tilinde qoldanatyn adamdardyń sany 30 paıyzǵa artqanyn málimdep otyr, – dedi Q. Toqaev.

Sondaı-aq ótken jyly Google kompanııasy qazaq tilin Gemini tildik modeline engizdi. Munyń bári – qazaq tilin ǵylym tili retinde damytý úshin júrgizilgen júıeli jumystyń bir nátıjesi.

– «Altyn shyqqan jerdi belden qaz» degen. Sondyqtan biz osy baǵytta bastalǵan óte qajetti ári mańyzdy jumysty toqtatpaı, jalǵastyra berýimiz kerek, – dedi Prezıdent.

Aıta keteıik, Memleket basshysy Qasym-Jomart Toqaev Halyqaralyq «Qazaq tili» qoǵamynyń H quryltaıynda sóz sóılep jatyr.

Prezıdent qazaq tiliniń abyroı-bedelin arttyrý úshin tabandy jumys isteý kerektigin aıtýda.

Jańa Konstıtýtsııada «Táýelsizdik» jáne «Egemendik» sózderin bas árippen jazylatyn boldy.