Álemniń 56 eli Dúnıejúzilik jylqy kúni týraly qarardy qoldady
ASTANA. KAZINFORM — Mońǵolııa Prezıdenti bastamashy bolǵan «Dúnıejúzilik jylqy kúni týraly» qararǵa álemniń 56 eli qosyldy, dep habarlaıdy Montsame.
Dúnıejúzilik jylqy kúni jyl saıyn 11–13 shilde aralyǵynda Tóv aımaǵy Argalant somony aýmaǵyndaǵy Húı Doloon Hýdeg jerinde ótkiziledi.
Mońǵolııa Prezıdenti Ýhnaagıın Húrelsúh bastamashy bolǵan «Dúnıejúzilik jylqy kúni týraly» qarar Birikken Ulttar Uıymy Bas Assambleıasynyń 79-sessııasynda 2025 jylǵy 3 maýsymda qaralyp, qabyldandy. Bul qararǵa Aýstrııa, Bahreın, Brazılııa, Ońtústik Koreıa, Qytaı, Reseı, Germanııa, Venesýela, Portýgalııa, Taıland, Qatar, Japonııa, Túrkııa, Qyrǵyzstan jáne Qazaqstandy qosa alǵanda, 56 memleket qosyldy.
«Naadam» ulttyq merekesin uıymdastyrý komıteti ulttyq merekeni ótkizýge daıyndyq jumystaryn, sondaı-aq Uly Mońǵol ımperııasynyń qurylǵanyna 820 jyl tolýyn jáne Dúnıejúzilik jylqy kúnin atap ótý is-sharalaryn úılestiredi.
Aıta ketelik Mońǵolııadaǵy qazaqtar Naýryz meıramyn qalaı toılaıtyny týraly jazǵan edik.
