Silk Way Star: Álemniń 508 myńnan astam kórermeni daýys berdi
ASTANA. KAZINFORM — Silk Way Star halyqaralyq vokaldyq baıqaýynyń grand-fınalynan keıin baspasóz konferentsııasy ótti. Azııanyń 12 elin qamtyǵan megajoba bıyl eleýli halyqaralyq qyzyǵýshylyqqa ıe boldy.
Jıynda uıymdastyrýshylar kelesi maýsymǵa qatysýǵa nıet bildirgen jańa elder týraly málimdep, kórermender daýys berýi men halyqaralyq qazylar alqasynyń qorytyndy derekterin jarııalady.
Uıymdastyrýshylardyń málimetinshe, daýys berýge álemniń túrli elderinen 508 287 adam qatysqan. Bul — aımaqtaǵy mýzykalyq jobalar arasyndaǵy eń joǵary kórsetkishterdiń biri. Jeńimpazdar 50 paıyz kórermen daýysymen, 50 paıyz qazylar alqasynyń baǵasymen anyqtaldy.
— Silk Way Star Azııanyń mádenı alýan túrliligin toǵystyrǵan biregeı alańǵa aınaldy. Joba mýzyka arqyly elder arasyndaǵy ózara túsinistikti arttyryp, dıalog keńistigin qalyptastyrdy. Jarty mıllıonnan astam daýys halyqaralyq qyzyǵýshylyqtyń aıqyn belgisi, — dedi Jibek Joly telearnasynyń basqarýshy dırektory Erkejan Kúntýǵan.
Sondaı-aq ol kórermender daýys berýiniń qorytyndysyn da jarııalady.
— Mıshel Djozef (Mońǵolııa) –112 241 daýys, Madınaboný Adylova (Ózbekstan) –85 443, Chjan He Sıýan (Qytaı) –73 662, ıAzmın Azız (Malaızııa) –73 609, Saro Gevorgıan (Armenııa) –73 160, Avtandıl Abeslamıdze (Grýzııa) — 46 027, ALEM (Qazaqstan) –32 145, –dep atap ótti Erkejan Kúntýǵan.
Grand-fınal jónindegi jarııalanymdar 25 eldiń áleýmettik jelilerinde tarady. TMD, Kavkaz, Shyǵys jáne Ońtústik-Shyǵys Azııa, Taıaý Shyǵys, Eýropa, Soltústik jáne Ońtústik Amerıka elderiniń qoldanýshylary baıqaý týraly jazbalar qaldyrǵan.
Eýrazııalyq bıýronyń bas redaktory, CMG ókili Van Delý halyqaralyq jobanyń óńirlik mádenı yntymaqtastyqqa qosqan úlesin atap ótti. Onyń aıtýynsha, qytaılyq kórermender baıqaýdyń uıymdastyrylýyn joǵary baǵalaǵan.
— Keshe Qazaqstan Prezıdenti Qasym-Jomart Toqaevtyń fınalısterge arnaıy quttyqtaý joldaǵanyn kútpegen edik. Bul baıqaýdyń mańyzyn jáne Qytaı medıakorporatsııasyna kórsetilgen senimdi bildiredi. Ekinshi maýsym Qytaıda ótedi, jeltoqsanda uıymdastyrý máselelerin qazaqstandyq áriptesterimizben birlesip talqylaımyz, — dedi ol.
CMG ókiliniń sózinshe, Qytaıda kelesi maýsymǵa daıyndyq bastalyp ketti. Jobanyń jańa maýsymyn qazaqstandyq telejúrgizýshi Dıana Skatova júrgizedi.
Silk Way Star dástúrli formattarǵa qaraǵanda ózgeshe uıymdastyrylǵan. Kelesi maýsym árdaıym jeńimpaz elde emes, Qazaqstan men Qytaıdyń birlesken kelisimi aıasynda ótkiziledi. Sondyqtan alǵashqy maýsym Astanada bastalyp, kelesi maýsym Qytaıda jalǵasady.
Konkýrsqa qatysýǵa nıet bildirgen elder qatary artyp keledi. Indonezııa, Úndistan, Pákistan, Vetnam, sondaı-aq birneshe arab memleketteri jobaǵa qosylýǵa qyzyǵýshylyq tanytqan.
Sarapshylardyń pikirinshe, búkil qurlyqty qamtıtyn balama jobalardyń joqtyǵy Silk Way Star aıasyn keńeıtýdi qısyndy etedi.
Konferentsııa barysynda, baıqaýdyń jeńimpazy, mońǵolııalyq Mıshel Djozef qazaq tilinde án daıyndap jatqanyn aıtty.
— Men qazaq tilin óte jaqsy kóremin. Ol ádemi til, ony úırengim keledi. Qazaqstandaǵy tyńdarmandaryma arnap arnaıy jańa án shyǵarýdy josparlap júrmin, — dedi ol.
Eske salsaq, «Silk Way Star» jobasyn júzege asyrý týraly kelisim 2025 jylǵy 16 maýsymda Astanada Qazaqstan Prezıdenti Qasym-Jomart Toqaev pen QHR Tóraǵasy Sı Tszınpınniń qatysýymen qol qoıylǵan edi.
Kórermender daýysy álemniń 43 elinen túsken. Eń belsendi elder qatarynda Qazaqstan, Qytaı, Mońǵolııa, AQSh, Reseı, Túrkııa, Germanııa, Sıngapýr, Indonezııa, Ózbekstan, Grýzııa jáne Malaızııa bar.
Fınal Qazaqstanda Jibek Joly arnasynda tikeleı efırde kórsetildi. Qyrǵyzstanda «Mýzyka» jáne «Madanııat» arnalary, Ázerbaıjanda Space TV, Tájikstanda TV Safına, Mońǵolııada UBS jáne AIST GLOBAL arnalarynan parallel efır júrgizildi. Barlyq telearnalar men strımıngtik servısterdiń jınaqtalǵan aýdıtorııasy 120 mıllıon kórermenge jetti.
Sonymen qatar «Silk Way Star» halyqaralyq jobasynyń grand-fınaly máresine jetip, jobanyń jeńimpazy Mıshel Djozef (Mońǵolııa) boldy.