Álemniń 47 eli azyq-túlik tapshylyǵynyń zardabyn tartyp otyr
ASTANA. KAZINFORM - 2025 jyly ashtyq resmı túrde eki óńirde – Gaza sektorynda jáne Sýdanda tirkeldi. Mundaı jaǵdaı resmı esep júrgizile bastaǵaly alǵash ret bolyp otyr AlJazeera.
Álemniń 47 elinde shamamen 266 mıllıon adam ótkir azyq-túlik tapshylyǵyna tap bolǵan. Bul kórsetkish 2016 jylmen salystyrǵanda eki esege jýyq joǵary.
Negizgi sebep – qarýly qaqtyǵystar men zorlyq-zombylyq. Olar 147 mıllıon adamnyń turmys-tirshiligine tikeleı áser etken. Budan bólek, klımattyq ózgerister men ekonomıkalyq kúızelister de jaǵdaıdy kúrdelendirgen.
Balalardyń jaǵdaıy erekshe alańdatady: 35,5 mıllıon bala tamaq tapshylyǵynan zardap shegip otyr. Sonymen qatar 2025 jyly gýmanıtarlyq kómekke bólinetin qarjy kólemi azaıǵan.
Osyǵan deıin Somalıde mıllıondaǵan adam ashtyqtyń zardabyn tartyp otyrǵany týraly jazdyq.
