Álemniń 26 elinen kelgen 800 sportshy Azııa chempıonatynda synǵa túsedi
ASTANA. KAZINFORM – 16-30 tamyz kúnderi Shymkent qalasynda nysana kózdeýden jáne stend atýdan 16-shy Azııa chempıonaty ótedi. Bul týraly Týrızm jáne sport mınıstrliginiń baspasóz qyzmeti habarlady.
Sary qurlyq dodasyna Bahreın, Vetnam, Gonkong, Úndistan, Qatar, Qytaı, Kýveıt, Malaızııa, BAÁ, Oman, Saýd Arabııasy, Sıngapýr, Ońtústik Koreıa, Japonııa syndy 26 memleketten 800-den astam sportshy qatysady.
Jasóspirimder, jastar men eresekter arasyndaǵy Azııanyń tańdaýly mergenderi eki apta boıy Shymkent Shooting Plaza sport kesheninde ótetin saıysta barlyq dıstsıplına boıynsha (tapansha, vıntovka, jyljymaly nysana kózdeý, stend atý) ózara baq synaıdy. Chempıonat Qazaqstandyq sporttyq atý federatsııasynyń uıymdastyrýymen jáne Týrızm jáne sport mınıstrliginiń qoldaýymen ótedi.
Azııa birinshiliginde 700-den astam medal sarapqa salynady. Nysana kózdeý baǵdarlamasynda sportshylar pnevmatıkalyq tapansha (10 m), tapansha (25 jáne 50 m), vıntovka (10 jáne 50 m), sondaı-aq jyljymaly nysana kózdeýden jekeleı jáne komandalyq syndarda baq synaıdy. Stend atýda trap, skıt, skıt-mıks, trap-mıks, dýbl, jekeleı jáne komandalyq básekeler ótedi.
Aıta keterligi, mergender dodasyna Halyqaralyq nysana kózdeý federatsııasynyń (ISSF) prezıdenti Lýchano Rossı, Azııa nysana kózdeý qaýymdastyǵynyń (ASC) prezıdenti sheıh Salman ál-Sabah, Arab elderi jáne Kýveıttiń nysana kózdeý federatsııasynyń prezıdenti Dýaıch Alotaıbı, ISSF bas hatshysy Aleksandr Nıkotra Sent-Djeıms qatysady.
Memleket basshysynyń halyqaralyq yntymaqtastyqty nyǵaıtý jónindegi tapsyrmasyn oryndaý aıasynda bıyl jyl basynan beri Týrızm jáne sport mınıstri Erbol Myrzabosynov halyqaralyq sport federatsııalarynyń basshylarymen birqatar kezdesý ótkizdi. Osy ýaqytqa deıin elimizge Halyqaralyq aýyr atletıka federatsııasynyń (IWF) prezıdenti, Azııa aýyr atletıka federatsııasynyń tehnıkalyq komıtetiniń tóraǵasy, Halyqaralyq sý sporty federatsııasynyń prezıdenti, Halyqaralyq dzıýdo federatsııasynyń (IJF) prezıdenti, Halyqaralyq kúres federatsııasynyń (UWW) prezıdenti jáne basqa da joǵary laýazymdy tulǵalar resmı saparmen keldi.
Aıta ketelik Asyljan Arystanbekova reseılik tennısshini jeńip, sensatsııa jasaǵan edi.