Álemniń jas pıanısteri Astanada kezdesedi
ASTANA. 9 qazan. QazAqparat - Kelesi jyly Astana qalasynda Accordi di Astana halyqaralyq klassıkalyq mýzyka festıvalin ótkizý josparlanyp otyrǵany belgili.
Osy shara sheńberinde balǵyn pıanıster baıqaýyna da daıyndyq júrgizilip jatyr. Bul jaıynda elordanyń resmı saıtynda habarlanǵan.
Baıqaýdyń bastamashysy - belgili mýzykant, Reseıdiń halyq ártisi Denıs Matsýev. «Festıval-baıqaý - eń aldymen Qazaqstan men Reseı aýmaǵynan jas daryndardy izdeýge jol ashady. Baıqaý aıasynda halyq arasynan úlken sahnanyń sáni bolatyn óner ıelerin tabý oıymyzda bar», - deıdi belgili pıanıst.
Pıanınonyń has sheberi halyqaralyq qazylar alqasyn ózi basqarmaqshy. «Bul baıqaýda «barmaq basty, kóz qystyǵa» jol bermeımiz. Úzdikter ǵana jeńimpaz atanatyn bolady», - dep ýáde berdi D. Matsýev.
Birshama daıyndyq jumystary osy bastan júrgizilip jatqandyǵyn málimdedi baıqaýdy uıymdastyrýshylar. Óıtkeni alqa quramyna jan-jaqtan belgili óner sheberleri keledi dep kútilýde. Sonymen qatar Astanaǵa baǵyn synap kórý úshin jan-jaqtan jas pıanıster de aǵylmaq.
Jasóspirimder baıqaýyna qatysýǵa ótinim qabyldaý 2013 jyldyń qańtarynan bastalady. 15 jasqa deıingi balalardyń barlyǵy da ótinim jiberýge quqyly, degenmen eki jas sanatynan (kishi top - 11 jasqa deıingiler, jasóspirimder toby - 12 jastan bastap 15 jas aralyǵy) tek eń daryndy 30 ónerpaz irikteýden ótetin bolady.
Festıval sheńberinde baıqaýdan basqa álem mýzykasy sheberleriniń kontserti, sheberlik sabaqtary jáne tanymal kompozıtor, mýzykanttarmen kezdesýler uıymdastyrylatyn bolady.
