Álemniń úzdik ýnıversıtetteri reıtıngine Qazaqstannan bir ǵana JOO kirdi
Center for World University Rankings (CWUR) qurastyratyn álem ýnıversıtetteriniń akademııalyq reıtıngi - joǵary oqý oryndarynyń arasynda júrgiziletin aıtýly reıtıngterdiń biri sanalady.
Bıyl álemdegi 20 myńǵa jýyq joǵary oqý orny baǵalaýdan ótip, onyń ishinde úzdik 2 myń ýnıversıtet iriktep alynǵan.
Dál osy tizimge elimizden tek Nazarbaev ýnıversıteti (álemniń 19,8 mfyń JOO-lary arasyndaǵy TOP-2000 ishinde 1765 orynda tur) ǵana kirip otyr.
Munyń ústine Nazarbaev ýnıversıteti - tek Qazaqstannan ǵana emes, sonymen birge Orta Azııa elderinen atalǵan reıtıngke kirgen jalǵyz joǵary oqý orny.
TMD elderiniń ishinde bul reıtınge Reseıdiń 42, Ýkraınanyń 6, Belarýstyń 2 ýnıversıteti, al túrki memleketteriniń ishinde Túrkııanyń birden 56 joǵary oqý orny kirgen.
Álemniń úzdik 5 ýnıversıteti qatarynda AQSh-tyń Garvard ýnıversıteti, Massachýsets tehnologııa ýnıversıteti, Stenford ýnıversıteti, Brıtanııanyń Kembrıdj ben Oksford ýnıversıtetteri bar.
Aıta keterligi, elimizde joǵary oqý oryndarynyń sany birtindep qysqaryp, nashar oqý oryndary jabylyp jatyr. Olardyń bilim berý deńgeıine baqylaý da kúsheıtilgen.
Máselen, 2021-2022 oqý jylynda respýblıkada 122 JOO boldy. Salystyrmaly túrde aıtar bolsaq, osyndan 5 jyl buryn - 125, 10 jyl buryn - 146, al 20 jyl buryn 185 JOO bolǵan edi.
Bilim beretin joǵary oqý oryndary ishinde 83 ýnıversıtet, 16 akademııa, 12 ınstıtýt jáne olarǵa teńestirilen konservatorııa, joǵary mektep pen joǵary ýchılışe, 9 ulttyq joǵary oqý orny, 2 ulttyq zertteý ýnıversıteti bar.
Respýblıka joǵary oqý oryndarynda 36,4 myń oqytýshy bilim beredi.
Onyń 2,6 myńy - ǵylym doktory, 11,1 myńy - ǵylym kandıdaty, 2,4 myńy - professor, 5,2 myńy - dotsent ǵylymı ataǵyn alǵan.
3,4 myń oqytýshynyń fılosofııa doktory ǵylymı ataǵy bar.
