Álemniń úzdik palýandary elordaǵa jınalady
ASTANA. QazAqparat - Astanada 6 jáne 9 qyrkúıek aralyǵynda alǵash ret grepplıngten álem chempıonaty ótedi.
Baıraqty básekege 21 elden 800-den astam sportshy qatysady. Chempıonatqa Brazılııa, Fılıppın, Reseı, Lıtva, Panama, Ispanııa, Izraıl, Frantsııa, Italııa, Indııa, Ýkraına, Vengrııa, Japonııa, Polsha jáne grepplıngtiń tarıhı otany - AQSh-ta tirkelip úlgerdi.
Týrnır qarsańynda, Qazaqstan Respýblıkasynyń Mádenıet jáne sport mınıstrligi alańynda press-konferentsııa uıymdastyryldy. Baspasóz jıyn spıkerleri: Azııalyq Grepplıng komıtetiniń Prezıdenti Qanat Alın, Dúnıejúzilik grepplıng komıtetiniń Prezıdenti Rızvan Bochkaev jáne UWW Dúnıejúzilik grepplıng qaýymdastyǵynyń bas hatshysy Vıto Paýlıo.
Qaýymdastyq basshysy: «Bizdiń jas sportshylarymyzda kúshterin álemniń kil myqtylarymen synaýǵa tamasha múmkindik paıda boldy. Qazaqstan namysyn jaqynda ótken "QAZAQ BATYRY CHAMPIONSHIP" respýblıkalyq jarysynyń jeńimpazdary qorǵaıdy. Palýandarymyzdan árıne jeńis kútemiz. Bıyl Azııada biz kóshbasshy atandyq. Kelesi kezekte "álemdi" baǵyndyrý maqsaty tur», - dep atap ótti.
Baspasóz konferentsııa barysynda sporttyq jarystyń sımvoly tanystyryldy. Grepplıng Qaýymdastyǵy chempıonattyń tumary men alǵashqy halyqaralyq sporttyq-analıtıkalyq jýrnalynyń tusaýkeserin ótkizdi.
Tarıhı shaıqasta batyrlarymyzdy "búrkit" rýhtandyratyn bolady. Búrkit - erkindik pen erliktiń belgisi. Chempıonattyń sımvoly jaıly jaqynda jaryqqa shyqqan «QAZAQ BATYRY» halyqaralyq jýrnalynyń betterinen oqı alasyzdar. Avtorlar alǵashqy shyǵarylymyn "Álem Chempıonatyna" daıyndyǵyna arnady.
Esterińizge sala keteıik, grepplıngten álem chempıonaty 6-9 qyrkúıek aralyǵynda Astana qalasy "Dáýlet" sport kesheninde ótedi.
