Álemniń úzdik qymyz óndirýshileri «Qymyz-Fest» festıvaline jınalady
«Shilde aıynyń basynda oblysymyzda «Qymyz-FEST» pen «Baýyrsaq-PARTY» merekelik festıvaldaryn ótkizýge daıyndalyp jatyrmyz!», - dep jazdy oblys ákimdiginiń kásipkerlik jáne ındýstrıaldy-ınnovatsııalyq damý basqarmasynyń basshysy Qarlyǵash Aralbekova Facebook-tegi óziniń paraqshasyna.
Festıvaldardy oblys týrızminiń 33 mańyzdy nysandary tizimine engen kórikti jerlerdiń biri - Tórtkólde ótkizý josparlanýda.
Tarazdyń batysynda ornalasqan Tórtkólde orta ǵasyrdaǵy kerýen-saraı bolǵan. 2008 jyldan bastap ejelgi qorǵannyń ornynda Á.H.Marǵulan atyndaǵy arheologııa ınstıtýtynyń mamandary qazba jumystaryn júrgizip keldi. Bul qorǵan bizdiń dáýirimizdiń VI-VII ǵasyryna tıesili.
Tórtkóldegi festıval ashyq aspan astynda ótedi. Munda Qazaqstan óńirleri men ózge elderdiń 80-nen astam qymyz óndirýshisi óz ónimderin alyp kelmek.
Q.Aralbekovanyń aıtýynsha, EKSPO-2017 kórmesiniń qonaqtary úshin býkletter shyǵarylyp, derekti fılmder túsirilýde, sondaı-aq eskertkish kádesyılar daıyndalyp, tarıhı-mádenı nysandarǵa ekskýrsııalar ázirlenýde.
