Álemniń úzdik 35 taekvondoshysy Astanaǵa QR-da alǵash uıymdastyrylyp jatqan WTF gran-prı jarysyna keledi
ASTANA. QazAqparat - 29-31 tamyz kúnderi Astanadaǵy «Dáýlet» sport kesheninde Otandyq sport tarıhynda tuńǵysh ret taekvondonyń olımpıadalyq nusqasy (WTF) boıynsha Búkilálemdik Gran-prı ótedi.
Atalǵan báseke halyqaralyq kúntizbedegi eń bedeldi jarystardyń biri bolyp sanalady, týrnırdiń deńgeıi qurlyqtyq birinshilikter men qurlyq Oıyndaryna para-par. Gran-prıge álemdik reıtıngte tek úzdik 35 sportshynyń tizimine engender ǵana qatysýǵa shaqyrylady. Búgingi kúni Astanadaǵy týrnırge komandalardy tirkeý aıaqtaldy. Qatysýshy elder sany - 50, olardyń arasynda Koreıa, Iran, Reseı, AQSh jáne taǵy basqa álemdik lıderler bar, qatysýshylar sany - 209, qonaqtardyń arasynda álem chempıondary men Olımpıada Oıyndarynyń jeńimpazdary az emes.
QR Taekvando federatsııasynyń baspasóz hatshysy Nazerke Sultanbaıdyń aıtýynsha, Búkilálemdik Gran-prı serııasy - Olımpıadalyq salmaqtar boıynsha álemdik reıtıngtiń úzdik 35 sportshysynyń tizimine engender ǵana qatysa alatyn týrnırler. Qazaqstan ótkizýshi el retinde reıtıngten tys ár salmaqta bir qatysýshydan qosý múmkindigine ıe boldy. «Sońǵy reıtıng boıynsha úzdikter tiziminde tek Ferýza Ergeshovanyń esimi ǵana bar. Sol sebeppen bas qaladaǵy bedeldi básekede toǵyz qazaqstandyq sportshy baq synaıdy», - dedi ol tilshimizge bergen suhbatynda.
Astana-2014 Búkilálemdik Gran-prıine qatysatyn Qazaqstan quramasy:
Erler.
58 kg - Nursultan Mamaı
68 kg - Qaırat Sarymsaqov
80 kg - Maqsat Abdrambek
+80 kg - Smaıl Dúısebaı
Áıelder.
49 kg - Farıza Aldońǵarova
57 kg - Ásel Qoılybaı
67 kg - Gúlim Bıbalaeva
+67 kg - Ferýza Ergeshova, Mereke Júnisova
Qazirgi ýaqytta Qazaqstan komandasy Şýchınsktegi "Jaqsy-2" sport bazasynda daıyndyqtaryn pysyqtaýda. Taekvondoshylarymyz Astanaǵa 26 tamyz kúni keletin bolady.
