Álemniń túkpir-túkpirinen keledi – Almaty týrısterdi qyzyqtyratyn orynǵa aınaldy
QazAqparat tilshisi sheteldik meımandardyń Qazaqstan týraly pikirin tyńdap kórdi.
Osy jyldyń alty aıynda e-Qonaq týrısterdi tirkeý júıesine 557 myń sheteldik tirkelgen.
Byltyr osy kezeńde Qazaqstanǵa basqa elderden 144 myń týrıst kelgen.
«KazakhTourism» UK» AQ týrıster Qazaqstanǵa jıi keletin 10 eldiń tizimin atady: Reseıden – 218 myń adam, Ózbekstannan – 142 myń, Qytaıdan – 31 myń, Úndistannan – 16 myń, Qyrǵyzstannan – 15,8 myń, Tájikstan – 14 myń, Túrkııadan – 12,5 myń, Germanııadan –10 myń, AQSh-tan – 8 myń, Ońtústik Koreıadan – 6 myń.
Sondaı-aq olardyń Qazaqstannyń qaı óńirine kóbirek keletini belgili boldy. Máselen, alǵashqy ondyqqa: Almaty – 199 myń týrıst, Astana– 105 myń, Atyraý oblysy – 32,6 myń, Almaty oblysy – 29,5 myń, Mańǵystaý oblysy –25,6 myń, Aqtóbe oblysy – 23,2 myń, Shymkent – 15,6 myń, Aqmola oblysy kirdi.
QazAqparat tilshileri «Medeý» sport kesheni men «Shymbulaq» demalys ornynda boldy. Dál osy jerde jazda jumys kúnderi kóptegen shetel azamattaryn kezdestirýge bolady.
«Dohadan Almatyǵa dostarymmen birge osy eldiń tarıhy men mádenıetimen tanysý úshin ádeıi ushyp keldik. Topta altaýmyz, bes kún osynda bolamyz. Kóktóbeni aralap, qalany joǵarydan kórdik, bizge qatty unady. Qazaqstandyqtardyń qonaqjaı, meıirimdi ekenin baıqadyq. Ulttyq taǵamdardyń dámin tatyp kórdik, óte dámdi. Endi Sharyn, Kólsaı kólderi, Esik kóli sııaqty ulttyq saıabaqtarǵa barýdy josparlap otyrymz», - dep óz áserimen bólisti Monıka esimdi týrıst.
Katardan kelgen qonaqtarmen birge kelgen týrızm menedjeri Valentına Balkebaeva Qazaqstan nelikten olar úshin tartymdy ekenine jaýap berdi.
«Qazaqstan qazirgi ýaqytta Parsy shyǵanaǵy týrısteri arasynda óte tanymal. Olarda jazda óte ystyq bolady. Sondyqtan bizdiń taýlardy kórýge, taza aýamen demalýǵa, taǵamdarymyzdan dám tatýǵa, mádenıetimizben tanysýǵa keledi. Olardyń basym bóligi Almatyny tańdaıdy, óıtkeni mundaǵy klımat óte qolaıly. Qazir Qazaqstanǵa Katar, Birikken Arab Ámirlikteri, Úndistan, Reseı jáne Eýropa elderinen týrıster kóbirek keledi. Munyń bári jaqsy jarnamanyń arqasynda», - dedi ol.
Birikken Arab Ámirlikteri men Fılıppınnen kelgen shaǵyn topty da kezdestirdik.
«Bárimiz Dýbaıdan keldik. Qazaqstanda alǵash ret kórýimiz. Óte qyzyqty jáne ádemi el. Kóktóbe, Shymbulaqta boldyq, basqa da kórikti jerlerdi aralaıtyn bolamyz. Bizge aýa raıy unady», - dedi Dýbaıdan kelgen Kevın.
Fılıppındik týrıster Shymbulaqtyń sulýlyǵyna tánti boldy. Olar Kýveıtte dáriger, esepshi, zańger, ınjener bolyp jumys isteıtinderin aıtty.
«Biz saıahattaǵandy jaqsy kóremiz. Biz álemniń ártúrli elderinde boldyq: Úndistan, Kolýmbııa, Grýzııa, Ázerbaıjan, Eýropa elderi. Qazaqstan óte tartymdy memleket, bizge Almaty qalasy qatty unady. Biz taýlardy, tabıǵatty jaqsy kóremiz, sondyqtan Shymbulaqqa barýdy jón kórdik. Biz 3200 metr bıiktikke kóterildik, ol jaqtaǵy kórinis shynymen tań qaldyrady. Jalpy, qala óte qaýipsiz, taza, adamdary meıirimdi. Onyń ústine mundaǵy taǵamdar óte dámdi. Biz baqyttymyz», - dep jaýap berdi týrıster.
Tájirbıeli ekskýrsııa jetekshisi Svetlana Alferova Qazaqstanǵa álemniń túkpir-túkpirinen týrıster keletinin atap ótti.
Onyń paıymdaýynsha, týrıster aǵynynyń qarqyndy ósýi koronavırýsqa qarsy karantındik sharalar álsiregennen keıin baıqalady.
«Sheteldikterdiń legi, atap aıtqanda, Almatyda baıqalady. Munda týrıster álemniń túkpir-túkpirinen, eń aldymen Qytaıdan, Kýveıtten, Birikken Arab Ámirlikterinen, Avstralııadan, Jańa Zelandııadan jáne Eýropa elderinen keledi. Qonaqtardyń kópshiligi Qazaqstanǵa alǵash ret kelip jatyr. Olardy qazaq halqynyń mádenıteti, salt-dástúri, ádet-ǵurpy, tarıhy men tabıǵaty qyzyqtyrady. Sheteldikter qazaq halqynyń qonaqjaılyǵyna tánti», - deıdi ol.
Onyń aıtýynsha, Memleket basshysy eldegi týrızmdi damytýǵa erekshe kóńil bólip otyr. Sonyń arqasynda Qazaqstandy ózge elder kóbirek bile bastady.
«Qazir týrıstik kompanııalar da áleýmettik jelilerde belsendi jumys istep, óz qyzmetterin usynyp, týrısterdi túrli aktsııalar men baǵdarlamalarmen tarta bastady. Keıbireýler avtorlyq týrlardy uıymdastyrady. Mysaly, men de solaı isteımin – týrısterdi taýǵa aparamyn, al áriptesim Aqtaýǵa týrlar jasaıdy. ıAǵnı, naryqta jańa ónimder paıda bolady, týrısterdi tartý úshin sizge jańa chıpter oılap tabý kerek. Sonymen birge tabıǵatty burynǵy qalpynda saqtaý óte mańyzdy»,- dep qosty ol.
Sarapshylardyń pikirinshe, sheteldikterdi baǵa men vızasyz rejım qyzyqtyrady. Qazir Qazaqstan 26 memleketpen ózara vızasyz rejım engizý týraly kelissózder júrgizilýde. Olardyń qatarynda Avstrııa, Saýd Arabııasy, San-Marıno, Bahreın bar.
