Álemniń tórtinshi tenory atanǵan Hose Kýra elordada kontsert berdi
ASTANA. Shildeniń 2-si. QazAqparat - Keshe elordadaǵy Beıbitshilik pen kelisim saraıynda álemniń tórtinshi tenory atanǵan Hose Kýranyń kontserti boldy.
Argentınalyq oryndaýshymen birge opera prımadonnasy Barbara Frıttolı de án shyrqady.
«Álemdik opera juldyzdary Astanada» gala-kontserti aıasynda elorda tórinde óner kórsetken olar tyńdarmandardy ózderiniń erekshe daýystarymen, oryndaý sheberligimen tánti etti.
Dj.Verdı men Dj.Pýchchınıniń qazirgi ýaqyttaǵy úzdik oryndaýshysy sanalatyn Hose Kýra atalǵan ıtalıandyq kompozıtorlardyń operalyq arııalary men ývertıýralaryn naqyshyna keltire oryndap, tyńdarmannyń zor yqylyasyna bólindi.
Álemdik deńgeıde tanymal qos ánshiniń ónerine uıyǵan astanalyqtar olardy tipti sahnadan jibergisi kelmeı, birneshe márte qoshemetpen án oryndaýǵa shaqyrdy. Tyńdarmannyń meselin qaıtarmaǵan olar úsh márte sahna tórine kóterilip, ózderiniń repertýarlaryndaǵy úzdik shyǵarmalaryn oryndady. Sonymen qatar Hose men Barbara Beıbitshilik pen kelisim saraıyna jınalǵan halyqtyń demeýimen Abaıdyń «Kózimniń qarasy» ánin de shyrqady.
Álemdi moıyndatqan opera ánshilerin Alan Bóribaevtiń dırıjerligimen K.Baıseıitova atyndaǵy Ulttyq opera jáne balet teatrynyń sımfonııalyq orkestri demep otyrdy.
Argetınanyń Rozarıo qalashyǵynda 1962 jyly jeltoqsannyń 5-inde dúnıege kelgen Hose Kýra 12 jasynda gıtarada oınap, 15 jasynda hor dırıjeri bolǵan, al 16-ǵa kelgende fortepıanoda oınaýdy úırene bastaǵan. 1996 jyly Týrınniń Regio teatrynda alǵash ret Dj. Verdıdiń «Otello» operasyn oryndaǵannan keıin ol London, Vashıngton, Madrıd, Trıest, Mıýnhen, Býenos-Aıres, Nıtstsa, Parıj, Vena, Tsıýrıh, Varshava, Tokıo, Florentsııa sahnalarynda óner kórsetken. Osy kezden bastap ol álemniń barlyq jetekshi opera sahnalarynda óner kórsetip, tyńdarmandaryn tántti etip keledi.
