Álemniń tanymal sıqyrshylary elorda turǵyndaryn tań qaldyrmaq
ASTANA. QazAqparat - Astana adamdardyń armandary oryndalyp, ǵajaıyptar bolatyn orynǵa aınalmaq. Búgin jáne erteń elordada «Magic Astana» halyqaralyq sıqyrshylar festıvali ótedi, dep habarlaıdy astana.kz saıty.
5 shildede saǵat 17.00 Beıbitshilik jáne Kelisim saraıynda álemniń tanymal sıqyrshylary keremet gala-shoý uıymdastyrady. Erteń festıvaldi balalar úıleriniń tárbıelenýshileri men kóp balaly jáne turmysy tómen otbasylardan shyqqan balalar tamashalaıdy.
«Bul erekshe shara, onda tanymal ári daryndy sıqyrshylar bas qosady. Bul joba aldaǵy jyldary da jalǵasyn tapsa eken deımin. Óıtkeni dúnıejúzinde osy sııaqty shara joq. Qazaqstanda Astanada atalmysh jobanyń ıgi dástúrge aınalýyna tilektespin, onyń ústine, sharany halyqaralyq deńgeıge kóterý boıynsha ıdeıalarymyz da bar», - dedi «Magic Astana» festıvaline qatysýshylardyń biri, sıqyrshy Sergeı Safronov.
«Búgin barsha álemge dúnıejúzin tań qaldyratyn sıqyrshylardyń bizdiń memleketterde de bar ekenin dáleldemekpiz», - ded ol.
Sergeı Safronovtyń aıtýynsha, kórermender nazaryna erekshe dýman usynylmaq. Nómirlerdiń bári mıkro sıqyrlyqtan makro sıqyrlyqqa deıin birneshe baǵytta daıyndaldy.
Eske salaıyq, «Magic Astana» dýmany Qazaqstanda tuńǵysh ret ótkiziledi. Festıval qonaqtary - aǵaıyndy Safronovtar, «Ýdıvı menıa» shoýyna qatysýshylar, daryndy sıqyrshylar Aleksandra Skachkova, Anton Abrashekov, Aleksandr Mýrataev pen Pavel Karahtanov. Sondaı-aq, «Ýkraınanyń birinshi fenomeni» atanǵan Artem Tıhevıch, joǵary sanattaǵy qyrǵyz ıllıýzıonısi Ildar ıAgofarov kórermenderdi ózderiniń ónerlerimen tánti etpek. Al gollandııalyq ıllıýzıonıster «MagicUnlimited» baǵdarlamasyn usynady.
