Álemniń tanymal 100 kitaby qazaq tiline aýdarylady

ASTANA. 14 qańtar. QazAqparat - «Nur Otan» HDP «Jas otan» jastar qanaty «Kel, jastar, oqylyq!» respýblıkalyq sharasyn qolǵa alyp otyr.

Onyń aıasynda álemniń eń tanymal 100 kitabyn qazaq tiline aýdarý josparlanǵan.

«Jas otan» jastar qanatynyń múshesi Baqytjan Narymbetovtyń aıtýynsha, álemniń úzdik 100 kitabyn irikteý úshin arnaıy komıssııa qurylatyn bolady. Onyń quramyna jas fılologtar, belgili blogerler, aqyn-jazýshylar kiredi. Olar memlekettik tilge aýdarylatyn ádebıettiń sapasyn baǵalaıdy. Sondaı-aq ǵalamtorda saýalnama júrgiziledi. Ol arqyly jastar óz daýysyn qosyp, úzdik 100 kitapty irikteýge qatysa alady.

Jalpy, «Kel, jastar, oqylyq!» respýblıkalyq sharasynyń basty maqsaty - qazirgi jastardyń kitap oqýǵa degen qushtarlyǵyn arttyrý. Ol úshin san alýan mádenı is-sharalardy da uıymdastyrý josparlanǵan.