Álemniń eń jasyl záýlim úıi marapattaldy
ASTANA. QazAqparat - Maındaǵy Frankfýrtte záýlim ǵımarattardy salý ınnovatsııalary úshin halyqaralyq syılyq Mılandaǵy kógaldandyrylǵan Bosco Verticale turǵyn úı keshenine berildi.
dpa aqparattyq agenttigi habarlaǵandaı, halyqaralyq syılyqtyń qazylar alqasy bul tańdaýdyń záýlim ǵımarattardy kógaldandarýdyń jańa perspektıvalaryn ashyp, bolashaqta Eýropa qalalaryn salýǵa úlgi bola alatynyn alǵa tartty.
Bosco Verticale ıtalıan tilinen aýdarǵanda «vertıkaldy orman» degendi bildiredi. Keshen bıiktigi 80 jáne 112 metr bolatyn eki ǵımarattan turady. Jalpy alǵanda, onda 5000 buta men edenge qoıylǵan 11000 túp ósimdik bar. Bul «ormandaǵy munaralardyń» biri - 19 qabattyq, ekinshisi - 27 qabattan turady. Bul keshende barlyǵy 113 turǵyn páterler bar.
Záýlim úılerdi salý ınnovatsııalary úshin marapatyna sáýletshi Stefano Boerı men tapsyrys berýshi Manfredı Katella ıe boldy. Syıaqy qorynyń kólemi - 50 myń eýro.
