Álemniń eń kóp aqy tólenetin akteri belgili boldy
ASTANA. QazAqparat - Bıyl Gollıvýd akteri Djordj Klýnı álemdegi eń kóp aqy tólenetin akterlerdiń tizimin basqardy, dep habarlaıdy QazAqparat Entertainment Tonight portalyna silteme jasap.
Reıtıng Forbes jýrnalynyń saıtynda jarııalandy. Belgili bolǵandaı, Djordj Klýnı 2017 jylǵy 1 maýsymnan 2018 jylǵy 1 maýsymǵa deıin 239 mıllıon AQSh dollaryn tapqan. Klýnıge óziniń Casamigos Tequila kompanııasynyń satylymynan negizgi 233 mıllıon AQSh dollary túsken.
Ekinshi orynǵa Dýeın Djonson ornalasty. Ol «Djýmandjı: Djýnglı shaqyrady» blokbasterine qatysqany úshin 124 mıllıon AQSh dollaryn tapqan. Djonson basty rólge túsip qana qoımaı, gollıvýd klassıkasynyń sıkveline prodıýserlik etken.
Reıtıngtiń úshinshi ornynda 81 mıllıon AQSh dollarymen kishi Robert Daýnı tur. Akterge negizgi qarajat «Kek alýshylar. Sheksizdik soǵysy» fılminen túsken.
