Álemniń birinshi raketkasy Bartı US Open týrnırine barýdan bas tartty
NUR-SULTAN. QazAqparat – Álemniń birinshi raketkasy, Avstralııa sportshysy Eshlı Bartı koronavırýs pandemııasyna baılanysty AQSh-tyń Ashyq chempıonatyna (US Open) qatysýdan bas tartty. Tennısshiniń buǵan baılanysty túsiniktemesi Herald Sun basylymynda jarııalandy, dep habarlaıdy QazAqparat.
«Men jáne meniń komandam bıylǵy jyly AQSh-ta ótetin týrnırlerge, sonyń ishinde US Open-ge barmaýǵa sheshim qabyldadyq. Bul biz úshin ońaı bolǵan joq, biraq koronavırýstyń áli de aıtarlyqtaı qaýpi bar, sondyqtan saqtanbasa bolmaıdy. Men AQSh tennıs qaýymdastyǵyna (USTA) týrnırlerinde tek jaqsylyq bolýyn tilep, kelesi jyly AQSh-qa oralýymdy taǵatsyzdana kútemin», - dep málimdedi ol.
Bartı 24 jasta, ol 2019 jyldyń 24 maýsymynan bastap Áıelder tennıs qaýymdastyǵynyń (WTA) reıtınginde kósh bastap keledi. Úlken shlem toptamasy týrnırlerinde avstralııalyq tennısshiniń eń úzdik jetistigi – Frantsııanyń Ashyq chempıonatynda jeńiske jetýi. Sondaı-aq ol Avstralııa Ashyq chempıonatynyń jartylaı fınalyna ótip, Ýımbldondaǵy US Open-niń tórtinshi raýndyna deıin jetken. Bartı - WTA bastamasymen ótken segiz týrnırdiń jeńimpazy.
