Álemniń birinshi lańkesi óler aldynda Barak Obamaǵa qastandyq jasamaq bolypty
ASTANA. 18 naýryz. QazAqparat - Álemniń nómiri birinshi lańkesi Ýsama ben Laden ólerinen sál buryn óziniń jaqtastaryna AQSh Prezıdenti Barak Obama men Aýǵanstandaǵy halyqaralyq kúshterdiń qolbasshysy bolǵan Devıd Petreýsqa qastandyq jasaýdy uıymdastyrýǵa buıryq bergen.
Lenta-rý agenttiginiń habarlaýynsha, bul týraly «Ál-Kaıeda» kóshbasshysy óltirilgen úıden tabylǵan qujattarǵa súıenip, The Washington Post basylymy jazǵan kórinedi.
Redaktsııa qolyna túsken qujattarǵa sáıkes ben Laden amerıkandyq prezıdenttiń ushaǵyn atyp túsirýdi josparlapty. Lańkes Obama óltirilgennen keıin bılik basyna vıtse-prezıdent Djo Baıden keledi ári ol bul qyzmetke múldem daıyn emes, sondyqtan bul jaǵdaı AQSh-tyń dańǵarysqa ushyraýyna ákeledi dep sanaǵan. Sonymen qatar ol Petreýstiń kózi joıylsa, onda Aýǵanstandaǵy soǵystyń barysy ózgeredi dep eseptegen.
Degenmen de Obama ákimshiligi lańkesterdiń bundaı josparlary eshqashanda da prezıdent ómirine shynaıy qaýip tóndire almaıtyndyǵyn resmı málimdep otyr.
The Washington Post basylymnyń jazýynsha, ben Ladenniń úıinen tabylǵan atalǵan qujat qupııalandyrylǵan ári taıaý bolashaqta halyqqa jarııa etiledi.
Aıta keteıik, ótken jyly mamyrda «Ál-Kaıeda» lańkestik jelisiniń jetekshisi, «№1 lańkes» Ýsama ben Laden amerıkandyq arnaıy qyzmetterdiń Pákistanda júrgizgen operatsııasy barysynda óltirildi. Degenmen de osydan keıin AQSh-tyń arnaıy maqsattaǵy qyzmetshileri ben Ladendi óltirgen joq, ol bes jyl buryn qaıtys boldy degen de aqparat taraǵan bolatyn.
