Álemniń beldi ǵalymdary Astanada «jasyl» tehnologııa máselelerin talqylaıdy
ASTANA. QazAqparat - Álemge tanymal ǵalymdar «jasyl» tehnologııalardy adamzat turmysyna engizý máselelerin talqylaý úshin Astanada bas qosady, dep habarlaıdy «QazAqparat» HAA tilshisi.
Ortalyq kommýnıkatsııalar qyzmetiniń resmı ókili Oksana Loskýtova habarlaǵandaı, 12-13 shilde kúnderi elordada «Jasyl kópir» seriktestik baǵdarlamasy» atty halyqaralyq forýmy ótedi. Jıyn «jasyl» ekonomıka salasynda zamanǵa saı tehnologııalardy engizý boıynsha halyqaralyq tájirıbemen almasý, damý men bıznesti «kógaldandyrý» máselelerin talqylaý maqsatynda uıymdastyrylyp otyr.
Forým aıasynda Parıj klımattyq kelisimin iske asyrý jáne «jasyl» qarjyny mobılızatsııalaý úshin tómen kómirtekti tehnologııalar men saıasat máseleleri talqylanbaq.
QR Energetıka mınıstrliginiń baspasóz hatshysy Raýan Esqalıdiń aıtýynsha, is-shara sheńberinde halyqaralyq ınstıtýttarmen jáne kompanııalarmen memorandýmdarǵa qol qoıý josparlanýda. Mundaǵy maqsat - «jasyl» tehnologııalar dáýiri jolynda damý men jańǵyrýdy jedeldetý úshin Qazaqstanda ekologııa baǵytyndaǵy ekonomıkaǵa senimdi platformany ornatý.
«Forýmǵa Nobel syılyǵynyń laýreaty Rae Kvon Chýng, Pákistannyń klımatty ózgertý jónindegi federaldy mınıstri Zahıd Hamıd, Qazaqstandaǵy BUU Damý baǵdarlamasynyń turaqty ókili Norımasa Shımomýro jáne basqa da halyqaralyq jáne úkimettik emes uıymdardyń joǵary laýazymdy tulǵalary keledi. Budan bólek, forýmǵa qatysýshylar Aqmola oblysy, Arshaly aýdany Arnasaı aýylyndaǵy «Arnasaı» Jasyl tehnologııalar ortalyǵyna barady. Ol jerde ınnovatorlar men jastardyń qatysýymen «jasyl» tehnologııalar kórmesi ótedi», - deıdi Raýan Esqalı.
Aıan Bekenuly
