Álemniń ár túkpirinde júrgen aqtóbelikter qyrkúıekte bas qosady
AQTÓBE. QazAqparat - Qyrkúıekte «Aqtóbe - qutty meken» forýmy ótedi. Sharaǵa álemniń túkpir-túkpirinde júrgen aqtóbelikter qatysyp, týǵan jerdiń damýyna úles qosý, qoldan keler kómek berý máselelerin talqylaıtyn bolady, dep habarlaıdy QazAqparat tilshisi.
Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasynyń «Týǵan jer» jobasy Aqtóbede keń kólemde iske asyralýda. Búginde óńirde «Aqtóbe - qutty meken» forýmyna daıyndyq júrip jatyr. Qazirgi kúni álemniń 15 elinde turatyn 200-den astam aqtóbelik týǵan jerge kelip, forýmǵa qatysýǵa kelisim bergen.
«Týǵan jerge degen yqylas pen patrıotızmdi qalyptastyrý maqsatynda forým uıymdastyryp otyrmyz. Aqtóbe jerinde týyp-ósip, jumys istegen jerlesterimizdi óńirdiń áleýmettik-ekonomıkalyq damýyna úles qosýǵa shaqyramyz. Tizim jasaldy. Barlyǵy 321 adamnyń aty-jóni men olarǵa qatysty málimet jınaqtaldy. Qazirgi kúni álemniń 15 elinde turatyn 218 adam forýmǵa qatysýǵa kelisim berdi. Olardyń qatarynda kásipkerler men mádenıet, óner qaıratkerleri, sportshylar bar»,- dedi forýmdy uıymdastyrý komıtetiniń tóraıymy Sánııa Qaldyǵulova.
Forým aıasynda ataqty aqtóbelikter túrli semınarlar ótkizip, sheberlik sabaqtaryn uıymdastyrady. Qaıyrymdylyq kontsertter bolady. Ǵylymı-tájirıbelik konferentsııalar ótedi. Forým kezinde bıznestiń áleýmettik jaýapkershiligi aıasynda salynyp jatqan Jastar saraıy, Jekpe-jek saraıy men Shyǵarmashylyq akademııasyn ashý josparlanǵan.
«Týǵan jer» baǵdarlamasy aıasynda «Týǵan jerge taǵzym» aktsııasy ótip jatyr. Alǵashqy jartyjyldyqta aqtóbelikter quny 1 mıllıard teńge bolatyn 338 jobaǵa qoldaý kórsetti. Áleýmettik nysandardy salý, qaıta qalpyna keltirý, olardy zamanaýı tehnologııamen jabdyqtaý, kógaldandyrý, jol jóndeý jumystary júrdi»,- dedi S. Qaldyǵulova.
Aıta keteıik, forýmǵa oraı Aqtóbede zherlester.akt.kz ınternet-resýrsy iske qosyldy.
