Álemniń 67 eliniń azamattary Qazaqstanǵa vızasyz kele alady

ASTANA. QazAqparat - Qazaqstan 2025 jylǵa qaraı ishki jalpy ónimdegi týrızm salasynyń úlesin 8 paıyzǵa jetkizýdi josparlap otyr. Bul týraly búgin Ortalyq kommýnıkatsııalar qyzmetindegi brıfıngte Mádenıet jáne sport mınıstri Arystanbek Muhamedıuly aıtty, dep habarlaıdy QazAqparat tilshisi.

«Іshki jalpy ónimdegi týrızm salasynyń úlesin 2016 jylǵy 1 paıyzdan 2025 jyly 8 paıyzǵa deıin jetkizý syndy aýqymdy maqsat qoıylyp otyr», - dedi ol.

Onyń aıtýynsha, elimiz EKSPO halyqaralyq kórmesin óteý arqyly týrızm salasynda oń tájirıbe jınaı aldy.

«EKSPO kezinde Qazaqstanǵa 7 mıllıonnan astam adam  keldi. Bul onyń aldyndaǵy jyldan 18 paıyzǵa joǵary kórsetkish. Іshki týrızm aǵyny 20 paıyzǵa ósti. Árbir týrıst el ekonomıkasyna bir kelgende 50-den 350 dollarǵa deıin qarajat qaldyrýda», - dedi mınıstr.

Osy qarqyndy saqtaý maqsatynda jyl basynan beri elektrondy vıza engizý jumystary júrgizildi. Álemniń 67 eliniń azamattary týrıstik maqsatta Qazaqstanǵa vızasyz-aq kele alady.

«2018 jyldyń sońyna deıin Almaty men Astana arqyly ótetin QHR men Úndistannyń azamattary úshin 72 saǵattyń vızasyz tranzıt engizildi. Atalǵan rejımniń taıaýda ǵana engizilgenin (QHR azamattary úshin qańtardan, Úndistan úshin sáýir aıynan) eskersek, QHR men Úndistannan tranzıttik jolaýshylardyń aǵyny 9,8 myńǵa jýyq adamdy qurap, olardyń árqaısysy el ekonomıkasyna keminde 350 dollar qaldyrdy», - dedi ol.

Mınıstrdiń aıtýynsha, Qazaqstannyń respýblıkalyq týrıstik kartasynyń jobasy ázirlendi.

«Biz jobany júzege asyrý kezinde týrısterdiń aǵynyn jylyna 13 mıllıon adamǵa deıin jetkizemiz dep josparlap otyrmyz. Munan bólek, 5,8 mlrd dollar tikeleı ınvestıtsııa tartylyp, 64 myń turaqty jumys orny qurylady», - dedi Arystanbek Muhamedıuly.