Álemniń 50 elinde «Abaı dombyrasy-party» ótedi

NUR-SULTAN. QazAqparat - Qazaqtyń uly aqyny Abaıdyń 175 jyldyq mereıtoıyna oraı 2020 jyldyń 5 shildesinde 50-den astam shet elde halyqaralyq «Abaı dombyrasy-party» mádenı sharasy ótedi, dep habarlaıdy QazAqparat tilshisi.

«QR Tuńǵysh Prezıdenti - Elbasy Nursultan Nazarbaev jyl saıyn shildeniń birinshi jeksenbisinde Ulttyq Dombyra kúnin atap ótý bastamasyn kótergen bolatyn. Osyǵan oraı 2020 jyldyń 5 shildesinde 50-den astam shet elde halyqaralyq «Abaı dombyrasy-party» mádenı sharasy ótedi«, - dep atap ótedi QR Syrtqy ister mınıstrliginiń baspasóz qyzmetinen.

Sonymen qatar Abaı atyndaǵy Qazaq memlekettik akademııalyq opera jáne balet teatry men «Astana Opera» teatry A.Jubanov pen L.Hamıdıdiń «Abaı» operasymen shetelge gastrolderge shyǵady.

«Al Naýryz meıramynda shet elderde bilim alyp jatqan jastarymyz, otandastarymyz Naýryz meıramy qarsańynda elshilikterde «Uly Abaı – halyq júreginde» atty Abaı shyǵarmashylyǵy negizinde dıktant jazyp, #MenAbaıdyoqımyn halyqaralyq chellendjine qatysady», - deıdi vedomstvodan.

Esterińizge sala ketsek, taıaýda Aqordada Memlekettik hatshy Qyrymbek Kósherbaevtyń tóraǵalyǵymen Abaıdyń 175 jyldyq mereıtoıyn daıyndaý jáne ótkizý jónindegi memlekettik komıssııa otyrysy ótken bolatyn. Sol jıynda 2020 jyldyń 8 qańtarynda elordadaǵy «Qazaqstan» ortalyq kontsert zalynda Hakim Abaıdyń 175 jyldyq mereıtoıynyń bastalýyna arnalǵan saltanatty shara ótetindigi belgili bolǵan edi.

Jalpy, kelesi jyly uly aqynnyń 175 jyldyq mereıtoıyna oraı álemniń birqatar qalasynda Abaı eskertkishi boı kóterip, estelik poshta markalary shyǵarylady, ortalyqtar ashylady.

Munan bólek aqyn shyǵarmalary álemniń 30 tiline aýdarylady.