Álemniń 5 elinde Abai Uii mádenı-iskerlik úıi ashyldy

NUR-SULTAN. QazAqparat – QR Aqparat jáne qoǵamdyq damý mınıstrliginiń qoldaýymen shet elderde «Abai Uii» mádenı-iskerlik úıi jobasy iske qosyldy. Bul týraly «Otandastar qory» KEAQ vıtse-prezıdenti Maǵaýııa Sarbasov aıtyp berdi, dep habarlaıdy QazAqparat tilshisi.

«Aqparat jáne qoǵamdyq damý mınıstrliginiń qoldaýymen «Abai Uii» mádenı-iskerlik úıi jobasy iske qosyldy. Atalǵan joba sheteldegi qandastarmen mádenı-gýmanıtarlyq jáne iskerlik baılanystardy damytý maqsatynda áreket etedi. Joba aıasynda gýmanıtarlyq, mádenıet, ǵylym, bilim, sport jáne basqa saladaǵy túrli baǵdarlamalar júzege asyryla bastady», - dep atap ótti M. Sarbasov Ortalyq kommýnıkatsııalar qyzmetinde ótken baspasóz máslıhatynda.

Ótken 2020 jyly «Abai Uii» mádenı-iskerlik úıi Reseıdiń Omby, Ózbekstannyń Tashkent, Túrkııanyń Ystanbul, Germanııanyń Berlın, Ýkraınanyń Kıev qalalarynda ashylǵan.

«Bıyl 2021 jyldyń sońyna deıin osyndaı jobany qazaqtar kóp shoǵyrlanǵan Mońǵolııanyń Baıan-Ólgeı aımaǵynda, Reseıdiń Astrahan, Qyrǵyzstannyń Bishkek qalalarynda ashýdy josparlap otyrmyz. Bul árıne, sol elderdiń epıdemıologııalyq jaǵdaıyna, bıliginiń ustanymyna da baılanysty bolady. Degemen, qazir QR Syrtqy ister mınıstrligi men elshilikter arqyly jumys júrgizilýde, barlyq joba júzege asady degen oıdamyz», - deıdi Maǵaýııa Sarbasov.

Aıta keteıik, ártúrli málimetter boıynsha shet elderde 5-7 mln qazaq turady. Qazir naqty sanyn aıqyndaý úshin zertteý jumysy júrgizilip jatyr.

Shet elderde 250 qazaq mádenı ortalyǵy jumys isteıdi, «Otandastar» qory onyń 71-imen memorandým bekitken.