Álemniń 40-tan astam elinde qazaq kúresi damyp jatyr – qaýymdastyq

ASTANA. QazAqparat – Búginde álemniń birneshe elinde qazaq kúresi federatsııasy jumys istep tur. Bul týraly Mádenıet jáne sport mınıstrligi sport jáne dene shynyqtyrý isteri komıtetiniń tóraǵasy Erbol Myrzabosynov málim etti, dep habarlaıdy QazAqparat tilshisi.

Qazaq kuresi qaýymdastyǵy usynǵan málimetke sáıkes, elimizde 122 607 adam qazaq kúresimen aınalysady jáne 3897 úıirme bar.

Onyń ishinde 2735 úıirme aýylda, onda 73 054 adam jattyǵyp júr.

Jalpy qazaq kúresinen jylyna túrli deńgeıde 700-den astam jarys ótkiziledi.

Búgingi tańda álemniń 40-tan astam elinde qazaq kúresi federatsııalary jumys isteıdi.

«Memleket basshysy halyq joldaýynda sportpen aınalysý halyqqa qoljetimdi bolýy kerek degen edi. Onyń ishinde ulttyq sport túrleri de bar. Búginde ár aýylda qazaq kúresinen jattyqtyrýshy ári kúres kilemi bar. Atalǵan sport ásirese aýyl, aýdan ortalyqtarynda jaqsy damyǵan. Biz qazaq kúresin sport retinde ǵana emes, jas urpaqty tárbıeleý, qazaq jigitiniń bolmysyn qalyptastyratyn qural retinde qoldanyp jatyrmyz. Bul bastama búginde mektepte pılottyq joba retinde engizildi», - dedi Erbol Myrzabosynov elordada ótken Qazaq kuresi qaýymdastyǵy jıynynan keıin BAQ ókilderiniń saýalyna jaýap bere turyp.

Buǵan deıin habarlaǵanymyzdaı, bıyl kúzde Bakýde qazaq kúresinen Eýropa chempıonaty uıymdastyrylady.