Álemniń 23 elinde júrgen qazaqstandyqtar elge oralýǵa nıet bildirdi – QR SІM

NUR-SULTAN. QazAqparat – Álemniń 23 elinde júrgen 1285 azamatymyz Qazaqstanǵa oralýǵa nıet bildirip otyr. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi

«COVID-19 koronavırýs indetiniń órshýine baılanysty SІM-de Daǵdarystyq shtab iske qosyldy, ol QR-dyń shet elderdegi mekemelerinde qurylǵan barlyq jedel shtabtardyń jumysyn úılestiredi. Qazir álemniń 73 elinde 295 myńǵa jýyq qazaqstandyq bar», - dedi Aıbek Smadııarov.

Onyń atap ótýinshe, sheteldegi Qazaqstan azamattarynyń tizimi saǵat saıyn ózektendirilip otyrady. Qazaqstan Elshilikterinde jumys istep turǵan shtabtar azamattarǵa Otanǵa oralýdyń múmkindikteri týraly qajetti nusqaýlyqtar men aqparatty berýde.

«Sheteldegi bizdiń azamattarymyzdyń kóp bóligi, solardyń ishinde turaqty turýǵa, jumys, oqý jáne basqa maqsatta shet memleketterde turatyn azamattarymyz, ásirese jaǵdaıy turaqty elderde turatyndar, qaıtyp oralýǵa nıet bildirmeıdi. Olardyń arasynda dúrligý men úreı joq. Olar ornalasqan eldiń usynystary men erejelerin basshylyqqa alady, karantın rejımin jáne úıde oqshaýlaýdy saqtaıdy. Qazir tańda azamattarymyzdyń úılerine oralýy – SІM jumysynyń negizgi basymdyǵy. Búginde shet elderdegi qazaqstandyq týrısterdi eseptemegende álemniń 23 elinen 1285 azamat Qazaqstanǵa oralýǵa nıet bildirýde. Týrısterdi shyǵarýmen qazir Mádenıet jáne sport mınıstrligi aınalysyp jatyr»,- dedi resmı ókil.