Álemniń 200-den astam túrkitanýshy ǵalymdary Astanadaǵy konferentsııaǵa qatysýda
ANA. 20 mamyr. QazAqparat /Jasulan Amanbaıuly/ - Búgin Astanada Qazaqstan táýelsizdiginiń 20 jyldyǵyna arnalǵan «Túrki órkenıeti jáne táýelsiz Qazaqstan» atty halyqaralyq konferentsııanyń jumysy bastaldy.
Bul jıynǵa 18 eldiń 200-den astam túrkolog ǵalymdary qatysýda. Onyń ishinde túrki memleketteriniń Túrkııa, Ázirbaıjan, Ózbekstan, Qyrǵyzstan, sondaı-aq Reseı Federatsııasynyń quramyndaǵy Tatarstan, Bashqurtstan, Chývashııa, Haqasııa sııaqty elderden jáne Batys Eýropanyń Vengrııa eli men Reseıdiń Máskeý qalasynan áıgili túrkolog ǵalymdar kelgen.
«Biz búgin Astanada túrkologııa ǵylymynyń damýyna jańa serpin berý maqsatynda otandyq jáne shetel ǵalymdarynyń basyn qosyp otyrmyz. Táýelsiz Qazaqstanda túrki áleminiń yqpaldastyǵyna úlken mańyz beriledi. Bizdiń ortaq baılanystyrymyz kóp»,-dedi konferentsııanyń ashylý saltanatynda QR Bilim jáne ǵylym mınıstri Baqytjan Jumaǵulov.
Bul aıtýly is-sharanyń tarıhı, mádenı, ǵylymı mańyzy, halyqaralyq saıası róli aıyryqsha ekendigin atap ótken mınıstr, «halyqtar arasyndaǵy ekonomıkalyq, adamdyq, ónerkásiptik, mádenı jáne ǵylymı qarym-qatynastardyń damýy men kúsheıýi - bizdiń ortaq bolashaǵymyzdyń myzǵymas negizi» ekendigine basa nazar aýdartty.
3 kúndik konferentsııa barysynda ǵalymdar túrki ǵylymy salasyndaǵy baılanystardy keńeıtý, osy baǵyttaǵy zertteýlerdi damytý, álemdik jáne qazaqstandyq túrkologııany baǵamdaý taqyryptarynda suhbat júrgizedi.
Atalǵan halyqaralyq konferentsııa QR Bilim jáne ǵylym mınıstrligi Halyqaralyq túrki akademııasynyń uıymdastyrýymen ótýde.
Eske sala keteıik, ótken jyly QR Prezıdenti N. Nazarbaev túrkitildes memleketterdiń basshylarymen kelise otyryp, Astana qalasynda Halyqaralyq túrki akademııasyn ashty. Elbasy onyń aldyna túrki órkenıetiniń adamzat mádenıetinde alatyn ornyn álemdik úderisterdiń aıasynda paıymdaýdy mindettegen bolatyn. Az ýaqyt ishinde túrki halyqtarynyń tarıhyna, tiline, ádebıeti men ónerine arnalǵan 40-tan astam irgeli monografııalar daıarlandy. Olardyń ishinde akademık M. Z. Zákıevtiń (Tatarstan), professor A. V. Dybo (Reseı ǵylym akademııasy), professor D. D. Vasılev (RǴA), N. I. Egorov (Chývashııa) syndy ǵalymdardyń eńbekteri bar. Aldaǵy ýaqytta bul eńbekter serııa túrinde jaryqqa shyqpaq.
