Álemniń 20 eline ashtyq qaýpi tónip tur – BUU

NUR-SULTAN. QazAqparat – Álemniń 20 eli azyq-túlikke asa muqtaj. Eger tıisti kómek kórsetilmese bul elderde ashtyq bastalýy múmkin. Mundaı eskertýdi BUU-nyń azyq-túlik máselelerimen aınalysatyn eki mekemesi jasady, dep habarlaıdy QazAqparat BUU jańalyqtar ortalyǵyna silteme jasap.

Iemen, Ońtústik Sýdan jáne Nıgerııa soltústiginiń turǵyndary úshin ashtyq bastaldy delingen Birikken Ulttar uıymynyń Dúnıejúzilik azyq-túlik baǵdarlamasy jáne Azyq-túlik jáne aýylsharýashylyq uıymynyń daıyndaǵan baıandamasynda.

Ashtyq qaýpine tap bolǵan elderdiń kóbiniń Afrıkada ornalasqanymen, bul problema basqa óńirlerge de qatysty bolyp otyr: Azııadaǵy Aýǵanstan, Taıaý Shyǵystaǵy Sırııa men Lıvan, Latyn Amerıkasyndaǵy Gaıtı – osy jáne basqa memleketterge halyqaralyq qaýymdastyqtyń kómegi asa qajet.

Mamandar 34 mln adam «ólimge bir qadam jerde» turǵanyn aıtýda.

«Ómirlerdi saqtap qalyp, turǵyndardyń tabys kózderin saqtap qalý jáne jaǵdaıdyń odan ári nasharlaýyna jol bermeý úshin sharalar qoldaný – bizdiń ortaq paryzymyz», - dep atap ótti BUU Azyq-túlik jáne aýylsharýashylyq uıymynyń Bas dırektory Tsıýı Dýnıýı.

Onyń aıtýynsha, ashtyqty aldyn alý úshin shuǵyl halyqtyń osal toptaryna gýmanıtarlyq kómek kórsetip, qajet dep boljanǵan 5,5 mlrd dollardy jınaý qajet.