Álemniń 140 elin jaıaý aralaǵan lıvııalyq Nýrı Fýnas Aqtaýǵa jetti
Búginde onyń tólqujatynda mór qoıatyn oryn joq. Sebebi, álemniń 140-tan asa elinde bolǵan. Nýrıdiń Qazaqstanǵa saıahaty osy jyldyń aqpan aıynda bastaldy. Osy ýaqytqa deıin ol elimizdiń soltústigi men ońtústigin aralap úlgergen. Jalpy, alǵashqy saıahatyn 1998 jyly bastady. Ondaǵy maqsaty – Lıvııadan búkil álemge jáne álemnen Lıvııaǵa beıbitshilik, tatýlyq pen meıirimdilik jodaýyn jetkizý.
Álemdi jaıaý sharlaǵan Nýrı kóktemde Reseıge jetýdi josparlaǵan. Alaıda, jer jahandy jaılaǵan pandemııanyń saldarynan barlyq jospary keıinge qaldy. Jıhankez Qazaqstanǵa kelýdi sheshken. Sóıtip, úsh myńdaǵan shaqyrymdy artqa tastap, Kaspıı jaǵasyna kelip jetti.
«Kaspıı teńizi týraly kóp estidim. Osy ádemilikti óz kózimmen kórgim kelip, qulshynys paıda boldy. Erekshe atap ótkim keletini meniń jolymda izgi nıetti adamdar kóp kezdesti. Sonymen qatar eń keremet degen jerlerdi kórýime kómektesti. Adamdar: «Sizge azyq-túlik, taǵamdar kerek pe? Aqshadan qınalyp júrgen joqsyz ba? Baspana kerek pe?», - dep suraıdy. Men tipti azdap salmaq qostym. Sebebi ár eldiń ózindik taǵamdaryn jeımin. Endigi kezekte balyq jeıtin bolamyn», - dedi jaıaý saıahattaýshy Nýrı Fýnas.
Jıhankez mundaı uzaq jol týraly bir mınýtqa ókinbeıdi. Oǵan ystyq ta, qatal klımat ta kedergi emes. Osy jyldar ishinde Nýrı kez kelgen qaýipti jeńýge úırengen. Ol saıahattaý kezinde qıynshylyqtar bolǵanyn da atap ótti.
«Jabaıy janýarlar, qasqyrlar kezdesti. Alaıda, men bárine úırengenmin. Osyndaı oqıǵalar kezikse ózimdi qalaı ustaýdy bilemin. Adamdardyń beıbitshilik pen kelisimge degen senimin uıalatýdy maqsat etip qoıǵan bolatynmyn. Men adamdardy dinine, násiline qarap bólmeımin. Adamzattyń bárin jaqsy kóremin», - dedi ol.
Nýrı Fýnas myńdaǵan shaqyrymdy júrip ótip, óziniń erekshe mıssııasyn oryndaýmen keledi. Ol beıbitshilikti, adamǵa degen mahabbatyn, jaqynyna degen súıispenshilik pen meıirimdilik qatynastardy ornatýdy maqsat tutady.
Qazaqstan – Nýrı Fýnastyń Azııadaǵy sońǵy núktesi. Keıinirek ol Nur-Sultan qalasyna vızasyn uzartý maqsatymen barýdy kózdep otyr. Odan keıin Reseı, Ýkraınaǵa jol tartpaq. Al búkil álem boıynsha saıahaty aıaqtalǵan soń, Nýrı Fýnas Lıvııaǵa oralyp, otaǵasy bolýdy armandap otyr.