Álemniń 12 elinde qazaq tilin úıretetin 31 onlaın synyp ashyldy
«Otandastar» qorynyń uıymdastyrýymen 2019 jyly álemniń 25 elinen kelgen 5000 qandasty qamtyǵan 20-ǵa jýyq shara ótkizilse, 2020 jyly álemdi jaýlaǵan pandemııaǵa oraı barlyq joba onlaın formatqa kóshirilgen.
«Degenmen, jumys toqtap qalǵan joq. Osy rette álemniń 26 elindegi otandastardyń qatysýymen 5 800-den astam adamdy qamtyǵan 13 onlaın is-shara jáne 6 onlaın-joba uıymdastyryldy. 2021 jyly da pandemııalyq shekteýlerge baılanysty ZOOM baǵdarlamasynda 20 eldi qamtyǵan 20 onlaın kezdesý ótkizildi. Bul sharalardyń barlyǵynda syrttaǵy aǵaıynnyń kóshi-qon, iskerlik, mádenı-gýmanıtarlyq máseleler men jobalarǵa qatysty usynystary men ótinishteri talqylandy», - dedi M. Sarbasov Ortalyq kommýnıkatsııalar qyzmetinde ótken baspasóz máslıhatynda.
Qor shetelde turatyn otandastarǵa qazaq tili kýrstaryn uıymdastyrý úshin 12 elde 31 onlaın synyp ashqan.
Onlaın synyptar teledıdar, noýtbýk, kamera, taǵy basqa qajetti zamanaýı tehnıkalarmen qamtylǵan.
2020 jyly 300-den astam onlaın tegin sabaq ótkizildi. Oǵan myń jarym adam qatysyp, 400-ge jýyǵy qazaq tilin jetik meńgerdi degen sertıfıkat aldy.
Al 2021 jyly 350 tegin onlaın sabaq ótkizildi. Onda 900 qandas testileýge qatysyp, qazaq tilin meńgerip shyqty.
«Qazirgi ýaqytta QR Bilim jáne ǵylym mınıstrliginiń qoldaýymen sheteldegi qandastarǵa qazaq tilin úıretý boıynsha ortaq ámbebap oqý quraldy ázirlenýde. Sebebi, latyn qarpimen nemese tóte jazýmen saýat ashqan balalarǵa kırıllıtsa úıretý qıyn. Sondyqtan, ámbebap ádisnama qajet boldy. Bul qural jyl sońyna deıin daıyn bolýy múmkin, qosymsha habardar etemiz», - deıdi Maǵaýııa Sarbasov.
